വത്തിക്കാന്‍: വത്തിക്കാന്‍ ഭരണകൂടത്തിനെതിരെ പകര്‍പ്പവകാശ നിയമപ്രകാരം പരാതി നല്‍കി ചിത്രകാരി. റോം സ്വദേശിയായ സ്ട്രീറ്റ് ആര്‍ട്ടിസ്റ്റ് അലീസിയ ബാബ്‌റോവാണ് വത്തിക്കാനെതിരെ പരാതിയുമായി രംഗത്തെത്തിയിരിക്കുന്നത്.
2019ല്‍ വത്തിക്കാനിലെ ഒരു പാലത്തിനടുത്ത് താന്‍ വരച്ച യേശുവിന്റെ രൂപമാണ് 2020ല്‍ വത്തിക്കാന്‍ പുറത്തിറക്കിയ ഈസ്റ്റര്‍ സ്റ്റാമ്പുകളില്‍ ഉപയോഗിച്ചിരിക്കുന്നതെന്ന് അലീസിയ പറയുന്നു. അലീസിയ രൂപകല്‍പന ചെയ്ത പ്രത്യേക തരം ഹൃദയത്തിന്റെ രൂപമാണ് ഈസ്റ്റര്‍ സ്റ്റാമ്പുകളിലെ യേശുവിന്റെ ചിത്രത്തില്‍ ഉപയോഗിച്ചിരിക്കുന്നത്.
അലീസിയയുടെ അറിവോ അനുവാദമോ കൂടുതെയാണ് സ്റ്റാമ്പുകളില്‍ ഇവരുടെ വര്‍ക്കിന്റെ പകര്‍പ്പ് ഉപയോഗിച്ചിരിക്കുന്നത്. ഇവ വില്‍ക്കുകയും ചെയ്തുവെന്നും അലീസിയ ആരോപിക്കുന്നു. മാത്രമല്ല, താന്‍ ആ ആര്‍ട്ട് വര്‍ക്കിലൂടെ ഉദ്ദേശിച്ച ലക്ഷ്യങ്ങളെ കൂടി വത്തിക്കാന്‍ ലംഘിച്ചിരിക്കുകയാണെന്നും അലീസിയ പറഞ്ഞു.
2013ല്‍ അലീസിയ ആരംഭിച്ച Just Use It എന്ന ക്യാമ്പെയ്‌നിന്റെ ഭാഗമായാണ് തെരുവുകളില്‍ വിവിധ മതവിഭാഗങ്ങളുടെ ആരാധനാമൂര്‍ത്തികളില്‍ Just Use It എന്ന ഗ്രാഫിറ്റി ഹൃദയരൂപത്തില്‍ ഡിസൈന്‍ ചെ്‌യിരുന്നത്. ബുദ്ധന്റെയും വിഘ്‌നേശ്വരന്റെയും മേരിയുടെയുമെല്ലാം ചിത്രങ്ങള്‍ റോമിലെ തെരുവുകളില്‍ കാണാം. ഇതിന്റെ ഭാഗമായി 2019 ഫെബ്രുവരിയില്‍ അലീസിയ ചെയ്ത യേശുവിന്റെ ആര്‍ട്ട് വര്‍ക്കിലെ ഹൃദയത്തിന്റെ രൂപമാണ് വത്തിക്കാന്റെ സ്റ്റാമ്പുകളിലുള്ളത്.
