പതിറ്റാണ്ടുകളായി ഇന്ത്യൻ സിനിമയിൽ നിറഞ്ഞു നിൽക്കുകയാണ് മമ്മൂട്ടി. വിവിധ ഭാഷകളിൽ നിരവധി കഥാപാത്രങ്ങൾ അവതരിപ്പിച്ചിട്ടുള്ള അദ്ദേഹം തന്റെ എഴുപതുകളിലും ഇന്ത്യൻ സിനിമയെ ഞെട്ടിക്കുകയാണ്. നിരവധി സംവിധായകരെ മലയാള സിനിമയിലേക്ക് കൊണ്ടുവന്ന നടൻ കൂടിയാണ് മമ്മൂട്ടി.

മമ്മൂട്ടിയോടൊപ്പം സിനിമ ചെയ്യാനുള്ള തന്റെ ആഗ്രഹത്തെ കുറിച്ച് സംസാരിക്കുകയാണ് സംവിധായകൻ സുന്ദർ ദാസ്. സല്ലാപം, കുബേരൻ തുടങ്ങിയ വിജയ ചിത്രങ്ങൾ ഒരുക്കിയ അദ്ദേഹം അവസാനം ചെയ്ത സിനിമ വെൽക്കം ടു സെൻട്രൽ ജയിലാണ്.

വെൽക്കം ടു സെൻട്രൽ ജയിലിന് ശേഷം മമ്മൂട്ടിയോടൊപ്പം ഒരു സിനിമ ചെയ്യാൻ തനിക്ക് ആഗ്രഹമുണ്ടായിരുന്നുവെന്നും എന്നാൽ വർഷങ്ങളായി സിനിമയിലുള്ള താനിപ്പോൾ ഒരു സിനിമ ചെയ്യണമെന്ന് പറഞ്ഞ് ചെന്നാൽ മമ്മൂട്ടി അംഗീകരിക്കില്ലെന്നും സുന്ദർ ദാസ് പറയുന്നു. മാസ്റ്റർ ബിന്നിനോട് സംസാരിക്കുകയായിരുന്നു അദ്ദേഹം.

‘മമ്മൂക്കയെ വെച്ചൊരു സിനിമ ചെയ്യണമെന്ന് എനിക്ക് ആഗ്രഹമുണ്ട്. വെൽക്കം ടു സെൻട്രൽ ജയിൽ കഴിഞ്ഞപ്പോൾ അദ്ദേഹത്തെ കാണണമെന്ന്  എനിക്ക് ആഗ്രഹമുണ്ടായിരുന്നു.

നടനും സംവിധായകനുമായ രഞ്ജിത്തേട്ടനുമായി എനിക്ക് നല്ല സൗഹൃദമാണ്. ഞാൻ രഞ്ജിത്തിനോട്‌ പറഞ്ഞു, എനിക്കൊന്ന് മമ്മൂട്ടിയെ അപ്രോച്ച് ചെയ്യണമെന്ന്.

പക്ഷെ ഇപ്പോൾ ഞാൻ അപ്രോച്ച് ചെയ്യണമെന്ന് പറഞ്ഞാൽ ചിലപ്പോൾ അയാൾ എനിക്ക് നിന്നെ കാണണ്ട എന്ന് പറഞ്ഞേക്കാം. കാരണം ഇത്രയും വർഷമായി ഇത്രയും സിനിമയും ചെയ്തു. ഞാൻ പതിനൊന്ന് സിനിമയെ ചെയ്തിട്ടുള്ളൂ.

ഇരുപത് വർഷമായി ഞാൻ സിനിമയിൽ വന്നിട്ട്. ഇത്ര നാളായിട്ട് അവനെന്നെ കാണാൻ വന്നില്ലല്ലോയെന്ന് ഒരുപക്ഷെ മമ്മൂക്കക്ക് തോന്നാം. ഒരു ആർട്ടിസ്റ്റിന് ചിലപ്പോൾ അങ്ങനെയും തോന്നുമല്ലോ. എനിക്ക് നല്ല അടുപ്പം തോന്നിയിട്ടുള്ള ആളാണ് മമ്മൂക്ക. അതുകൊണ്ട് ഒന്നിച്ചൊരു സിനിമ ചെയ്യാനും ആഗ്രഹമുണ്ട്,’സുന്ദർ ദാസ് പറയുന്നു.

Content Highlight: Director Sundhar Das About Mammootty