ന്യൂദല്‍ഹി: മദ്യത്തിന് വില വര്‍ദ്ധിപ്പിച്ചതിന് പിന്നാലെ പെട്രോളിനും ഡീസലിനും വിലവര്‍ദ്ധിപ്പിച്ച് ദല്‍ഹി സര്‍ക്കാര്‍. പെട്രോളിന്റെയും ഡീസലിന്റെയും മൂല്യവര്‍ദ്ധിത നികുതി ഉയര്‍ത്തിയതിന് പിന്നാലെയാണ് ചൊവ്വാഴ്ച ഈ രണ്ട് ഇന്ധനങ്ങളുടെയും വിലയില്‍ വര്‍ദ്ധനവ് ഉണ്ടായിരിക്കുന്നത്.
ഡീസല്‍ വില ലിറ്ററിന് 7.1 ഉം പെട്രോളിന് 1.67 രൂപയുമാണ് ഉയര്‍ത്തിയിരിക്കുന്നത്. പെട്രോളിന് വാറ്റ് 27 ശതമാനത്തില്‍ നിന്ന് 30 ശതമാനമായി കൂട്ടി. ഡീസലിന്റെ വാറ്റ് 16.75 ശതമാനത്തില്‍ നിന്ന് 30 ശതമാനമായി ഇരട്ടിപ്പിക്കുകയും ചെയ്തു.
കൊവിഡ് 19 നെ തുടര്‍ന്ന് സമ്പദ് വ്യവസ്ഥയില്‍ വന്ന തകര്‍ച്ച മറികടക്കാനും വരുമാനം കൂട്ടാനുമാണ് സര്‍ക്കാരിന്റെ ഈ നീക്കം. തിങ്കളാഴ്ച മദ്യവിലയിലും വലിയ തോതിലുള്ള വര്‍ദ്ധനവ് സര്‍ക്കാര്‍ വരുത്തിയിരുന്നു. കൊറോണ ഫീ എന്ന പേരില്‍ 70 ശതമാനം വര്‍ദ്ധനവാണ് മദ്യത്തിന്റെ നികുതിയില്‍ വരുത്തിയിട്ടുള്ളത്.
