ഉന്നാവോ: ഉന്നാവോ സംഭവത്തില്‍ രാജ്യം മുഴുവന്‍ പ്രതിഷേധം അലയടിക്കുമ്പോള്‍, പൊലീസിന്റെ അനാസ്ഥ വെളിവാക്കി ഉന്നാവോയില്‍ത്തന്നെ മറ്റൊരു സംഭവം കൂടി. ഉന്നാവോയിലെ ഒരു പൊലീസ് സ്റ്റേഷനില്‍ ലൈംഗികാക്രമണ ശ്രമം നടന്നെന്ന പരാതിയുമായിച്ചെന്ന യുവതിയോട്, ‘പീഡനം നടന്നില്ലല്ലോ, അതു നടന്നശേഷം വരൂ’ എന്നായിരുന്നു ഒരു പൊലീസുകാരന്റെ മറുപടി.
ഉന്നാവോ പെണ്‍കുട്ടിയെ പ്രതികള്‍ തീകൊളുത്തിയ അതേ ഹിന്ദുപുര്‍ ഗ്രാമത്തില്‍ നിന്നുള്ള യുവതിയാണ് പൊലീസില്‍ പരാതിയുമായെത്തിയത്. എന്നാല്‍ തനിക്കുണ്ടായ അനുഭവം വെളിപ്പെടുത്തി യുവതി തന്നെ രംഗത്തെത്തുകയായിരുന്നെന്ന് ന്യൂസ് 18 റിപ്പോര്‍ട്ട് ചെയ്തു.
മാസങ്ങള്‍ക്കു മുന്‍പ് അതേ ഗ്രാമത്തിലുള്ള മൂന്നുപേര്‍ ചേര്‍ന്നു തന്നെ ലൈംഗികമായി ആക്രമിക്കാന്‍ ശ്രമിച്ചെന്നാണ് പരാതിയില്‍ പറയുന്നത്.
വാര്‍ത്തകള്‍ ടെലഗ്രാമില്‍ ലഭിക്കാന്‍ ഇവിടെ ക്ലിക്ക് ചെയ്യൂ
‘മരുന്നു വാങ്ങിക്കാനായാണു ഞാന്‍ പുറത്തിറങ്ങിയത്. വഴിയില്‍ വെച്ച് ഈ മൂന്നുപേര്‍ എന്നെ തടഞ്ഞുനിര്‍ത്തി. അവര്‍ വസ്ത്രം അഴിച്ചുമാറ്റാനും എന്നെ ആക്രമിക്കാനും ശ്രമിച്ചു.’-യുവതി പറഞ്ഞതായി ന്യൂസ് 18 റിപ്പോര്‍ട്ട് ചെയ്തു. ഇവര്‍ പ്രതികളെ തിരിച്ചറിഞ്ഞിട്ടുമുണ്ട്.
