'സ്റ്റേ ട്യൂണ്‍ഡ്, ഈ ബഹിഷ്‌കരണത്തിന് അമേരിക്ക വലിയ വില കൊടുക്കേണ്ടി വരും'; ബീജിങ് ഒളിംപിക്‌സില്‍ നിന്ന് നയതന്ത്രപിന്മാറ്റം നടത്തുന്ന രാജ്യങ്ങളോട് ചൈന
ഡൂള്‍ന്യൂസ് ഡെസ്‌ക്
Thursday, 9th December 2021, 3:32 pm
ന്യൂയോര്‍ക്ക്: 2022ല്‍ ബീജിങ്ങില്‍ വെച്ച് നടക്കാനിരിക്കുന്ന വിന്റര്‍ ഒളിംപിക്‌സ് ബഹിഷ്‌കരിക്കാന്‍ തീരുമാനിച്ച അമേരിക്കയടക്കമുള്ള രാജ്യങ്ങള്‍ക്ക് മുന്നറിയിപ്പ് നല്‍കി ചൈന.
‘ഈ നയതന്ത്ര ബഹിഷ്‌കരണത്തിന് അമേരിക്ക വലിയ വില കൊടുക്കേണ്ടി വരും,’ എന്നായിരുന്നു ചൈനയുടെ പ്രതികരണം. ചൊവ്വാഴ്ചയാണ് സര്‍ക്കാരിന്റെ പ്രസ്താവന പുറത്തുവന്നത്.
ബഹിഷ്‌കരണത്തിനെതിരായ നടപടി ചൈനയുടെ ഭാഗത്ത് നിന്നും വൈകാതെ ഉണ്ടാവുമെന്നും പ്രസ്താവനയില്‍ പറയുന്നു. ‘സ്റ്റേ ട്യൂണ്‍ഡ്’ എന്നായിരുന്നു ചൈനീസ് വിദേശകാര്യ മന്ത്രാലയത്തിന്റെ വക്താവ് ഷാവോ ലിജ്യാന്‍ മാധ്യമങ്ങളോട് പ്രതികരിച്ചത്.
നുണകളും അപവാദങ്ങളും അടിസ്ഥാനമാക്കിയാണ് അമേരിക്ക ബീജിങ് ഒളിംപിക്‌സ് വിഷയത്തില്‍ ഇടപെടുന്നതെന്നും ലിജ്യാങ് പ്രതികരിച്ചു.
