'കപട ഹിന്ദു സ്‌നേഹം നടത്തി രാഷ്ട്രീയ നാടകം കളിക്കുന്ന പ്രത്യയശാസ്ത്രത്തോട് യോജിപ്പില്ല'; ബി.ജെ.പി നേതാവ് പാര്‍ട്ടി വിട്ടു
ഡൂള്‍ന്യൂസ് ഡെസ്‌ക്
Sunday, 23rd February 2020, 10:27 am
കിളിമാനൂര്‍: പൊലീസുമായും ഭക്തരുമായും ഉണ്ടാക്കിയ ധാരണ ലംഘിച്ച് ക്ഷേത്രോത്സവത്തില്‍ ആര്‍.എസ്.എസ് കൊടി കെട്ടിയതില്‍ പ്രതിഷേധിച്ച് ബി.ജെ.പി നേതാവ് പാര്‍ട്ടി വിട്ടു. തോട്ടക്കാട് ബിജുവാണ് പാര്‍ട്ടി വിട്ടത്. ബി.ജെ.പി കിളിമാനൂര്‍ കരവാരം പഞ്ചായത്ത് ജനറല്‍ സെക്രട്ടറിയും മണ്ഡലം മുന്‍ പ്രസിഡണ്ടും കൂടിയായിരുന്നു ബിജു.
കരവാരം തോട്ടക്കാട് പന്തുവിള തൃക്കോവില്‍ ശിവക്ഷേത്രത്തിലെ ഉത്സവുമായി ബന്ധപ്പെട്ടുണ്ടായ തര്‍ക്കമാണ് പാര്‍ട്ടി വിടാന്‍ കാരണമായത്. നേരത്തെ ഉത്സത്തിന് ഇവിടെ ആര്‍.എസ്.എസ് കൊടികള്‍ കെട്ടിയിരുന്നു. എന്നാല്‍ ഇത്തവണ അത് വേണ്ടന്ന ധാരണയിലായിരുന്നു ഭക്തര്‍. എന്നാല്‍ ധാരണ തെറ്റിച്ച് ബി.ജെ.പി, ആര്‍.എസ്.എസ് പ്രവര്‍ത്തകര്‍ കൊടി കെട്ടുകയായിരുന്നു.
