അന്ന് കെട്ടിപ്പിടിച്ച് ഉമ്മ തന്നാണ് അനില്‍ പോയത്, ഓരോ വാക്കും തളരുന്നു; അനില്‍ നെടുമങ്ങാടിന്റെ വിയോഗത്തില്‍ ബിജു മേനോന്‍
ഡൂള്‍ന്യൂസ് ഡെസ്‌ക്
Sunday, 27th December 2020, 1:04 pm
കൊച്ചി: നടന്‍ അനില്‍ നെടുമങ്ങാടുമായുള്ള ഓര്‍മകള്‍ പങ്കുവെച്ച് നടന്‍ ബിജു മേനോന്‍. അയ്യപ്പനും കോശിയും എന്ന സിനിമയില്‍ ഒരുമിച്ചഭിനയിച്ചപ്പോഴുള്ള അനുഭവത്തെക്കുറിച്ചാണ് ബിജു മേനോന്‍ പറയുന്നത്.
അയ്യപ്പനും കോശിയുടെ സെറ്റില്‍ വെച്ചാണ് അനിലിനെ ആദ്യമായി കാണുന്നതെന്നും അനില്‍ ചെയ്ത സര്‍ക്കിള്‍ ഇന്‍സ്‌പെക്ടര്‍ സതീഷിന്റെ കഥാപാത്രം ഗംഭീരമാണെന്ന് കഥ കേട്ടപ്പോഴെ തോന്നിയിരുന്നുവെന്നും ബിജു മേനോന്‍ പറയുന്നു.
ആദ്യ സീന്‍ ചിത്രീകരിക്കുമ്പോള്‍ അനിലിന് നല്ല ടെന്‍ഷനായിരുന്നുവെന്നും പിന്നീട് താന്‍ അടുത്തിരുന്ന് സംസാരിച്ച് ടെന്‍ഷന്‍ മാറ്റുകയായിരുന്നുവെന്നും നടന്‍ ഓര്‍ത്തെടുത്തു. ആര്‍ക്കും പിടിതരാതെ നടക്കുന്ന പ്രകൃതമായിരുന്നു അനിലിന്റേതെന്നും റൂമിലേക്ക് ഭക്ഷണം കഴിക്കാന്‍ താന്‍ വിളിക്കുമ്പോള്‍ അനില്‍ പലതവണ ഒഴിഞ്ഞു മാറാറാണ് പതിവെന്നും ബിജു മോനോന്‍ പറഞ്ഞു.
