ഒമ്പത് രസങ്ങളെ അടിസ്ഥാനമാക്കി ഒമ്പത് കഥകള്‍ പറയുന്ന ആന്തോളജി ചിത്രമാണ് നവരസ. നവരസയില്‍ കരുണം എന്ന രസത്തെ അടിസ്ഥാനമാക്കിയുള്ള കഥ സംവിധാനം ചെയ്തിരിക്കുന്നത് മലയാളിയായ ബിജോയ് നമ്പ്യാരാണ്. എതിരി എന്നാണ് ചിത്രത്തിന്റെ പേര്.
നവരസയിലേക്ക് എത്തിയതിനെക്കുറിച്ച് തുറന്നുപറയുകയാണ് ബിജോയ് നമ്പ്യാര്‍. മണിരത്‌നം വിളിച്ചപ്പോള്‍ അക്ഷരാര്‍ത്ഥത്തില്‍ താന്‍ എടുത്തുചാടുകയായിരുന്നു ഈ പ്രൊജക്ടിലേക്കെന്നാണ് ബിജോയ് പറയുന്നത്.
തുടക്കത്തില്‍ മറ്റ് സംവിധായകര്‍ ആരാണെന്ന് അറിഞ്ഞിരുന്നില്ലെന്നും സാമൂഹ്യപ്രതിബദ്ധതയുടെ ഭാഗമായി ചെയ്യുന്ന പ്രൊജക്ട് എന്ന രീതിയില്‍ തനിക്കിത് ചെയ്യുന്നതില്‍ സന്തോഷമുണ്ടെന്നും മാതൃഭൂമിക്ക് നല്‍കിയ അഭിമുഖത്തില്‍ ബിജോയ് പറഞ്ഞു.
പതിനഞ്ച് വര്‍ഷത്തോളമായി മണിരത്‌നത്തെ അറിയാമെന്നും ഗുരു എന്ന ചിത്രത്തിലാണ് അദ്ദേഹത്തോടൊപ്പം ആദ്യം പ്രവര്‍ത്തിക്കുന്നതെന്നും ബിജോയ് പറയുന്നു.
രേവതി, പ്രകാശ് രാജ്, വിജയ് സേതുപതി എന്നിവരാണ് എതിരിയില്‍ അഭിനയിക്കുന്നത്.
