ഇംഗ്ലണ്ടിനെതിരെയുള്ള ഇന്ത്യയുടെ നാലാമത്തെ മത്സരം മഹാരാഷ്ട്ര ക്രിക്കറ്റ് അസോസിയേഷന്‍ സ്റ്റേഡിയത്തില്‍ നടക്കാനിരിക്കുകയാണ്. നിലവില്‍ ആദ്യ രണ്ട് മത്സരങ്ങള്‍ ഇന്ത്യ വിജയിച്ചപ്പോള്‍ മൂന്നാം മത്സരത്തില്‍ ഇംഗ്ലണ്ട് വിജയം സ്വന്തമാക്കിയിരുന്നു.

പരമ്പരയിലെ ആദ്യ മൂന്ന് മത്സരത്തിലും വെടിക്കെട്ട് ബാറ്റര്‍ സഞ്ജു സാംസണിന് മികച്ച പ്രകടനം പുറത്തെടുക്കാന്‍ സാധിച്ചിട്ടില്ല. ഈഡന്‍ ഗാര്‍ഡന്‍സില്‍ നടന്ന ആദ്യ മത്സരത്തില്‍ 20 പന്ത് നേരിട്ട് 26 റണ്‍സ് നേടിയ സഞ്ജുവിന് ചെപ്പോക്കില്‍ നടന്ന രണ്ടാം മത്സരത്തില്‍ ഏഴ് പന്തില്‍ വെറും അഞ്ച് റണ്‍സ് മാത്രമാണ് നേടാന്‍ സാധിച്ചത്. കഴിഞ്ഞ മത്സരത്തില്‍ മൂന്ന് റണ്‍സിനും പുറത്തായ സഞ്ജു മൂന്ന് തവണയും ജോഫ്ര ആര്‍ച്ചറിന്റെ പന്തിലാണ് പുറത്തായത്.

ഇപ്പോള്‍ സഞ്ജുവിനെക്കുറിച്ച് പറയുകയാണ് മുന്‍ ഇന്ത്യന്‍ താരം ആകാശ് ചോപ്ര. ആര്‍ച്ചറുടെ ഭീഷണിയെ സഞ്ജു എങ്ങനെ നേരിടുമെന്ന് കാണാന്‍ കാത്തിരിക്കുകയാണ് താനെന്നും യൂട്യൂബ് ചാനലില്‍ ചോപ്ര പറഞ്ഞു.

‘നമുക്ക് സഞ്ജു സാംസണെ കുറിച്ച് പറയാം. ഇപ്പോള്‍ നാലാമത്തെ മത്സരമാണ്. ജോഫ്ര ആര്‍ച്ചര്‍ വീണ്ടും നിങ്ങള്‍ക്ക് എതിരെ വരും, ഇനി നിങ്ങള്‍ എങ്ങനെ പ്രതികരിക്കും എന്ന ചിന്ത എല്ലാവര്‍ക്കും ഉണ്ടാകും. ഒരേ ബൗളറോട് ഒരേ രീതിയില്‍ പുറത്തായാല്‍ അന്താരാഷ്ട്ര ക്രിക്കറ്റ് നിങ്ങളോട് ആവര്‍ത്തിച്ച് ചോദ്യങ്ങള്‍ ചോദിക്കും.

ആര്‍ച്ചര്‍ മാത്രമല്ല മറ്റുള്ള താരങ്ങളും സമാന രീതിയില്‍ സഞ്ജുവിനെ ആക്രമിക്കും. സഞ്ജുവിനെ സംബന്ധിച്ച് ബൗണ്‍സറുകള്‍ ഇന്ന് ഒരുപാട് നേരിടേണ്ടിവരും. അവന്‍ എന്ത് തന്ത്രവുമായിട്ടാണ് ഇറങ്ങുന്നത് എന്ന് എനിക്ക് കാണണം. സഞ്ജു തിരിച്ചടിക്കുന്നത് കാണാന്‍ കാത്തിരിക്കുകയാണ് ഞാന്‍,’ ചോപ്ര യൂട്യൂബ് ചാനലില്‍ പറഞ്ഞു.

നാലാം മത്സരത്തില്‍ സഞ്ജു തകര്‍പ്പന്‍ പ്രകടനം കാഴ്ചവെച്ച് തിരിച്ചെത്തുമെന്നാണ് ആരാധകര്‍ വിശ്വസിക്കുന്നത്. നിലവില്‍ ടി-20ഐയില്‍ 40 മത്സരങ്ങളിലെ 36 ഇന്നിങ്‌സില്‍ നിന്ന് 26.4 എന്ന ആവറേജില്‍ 844 റണ്‍സാണ് സഞ്ജു നേടിയത്. മാത്രമല്ല 111 റണ്‍സിന്റെ ഉയര്‍ന്ന സ്‌കോറും മൂന്ന് സെഞ്ച്വറിയും രണ്ട് അര്‍ധ സെഞ്ച്വറിയും ഫോര്‍മാറ്റില്‍ സഞ്ജുവിനുണ്ട്.

Content Highlight: Akash Chopra Talking About Sanju Samson