സിനിമയുടെ ബ്ലാക്ക് ആന്‍ഡ് വൈറ്റ് കാലത്തിനൊപ്പം സഞ്ചരിച്ച് മലയാളത്തിന്റെ എല്ലാ മാറ്റങ്ങളും അനുഭവിച്ചറിഞ്ഞ അപൂര്‍വം അഭിനേതാക്കളില്‍ ഒരാളാണ് മധു. പ്രേം നസീര്‍, സത്യന്‍, ജയന്‍ തുടങ്ങിയ നടന്‍മാര്‍ക്കൊപ്പം എഴുപതുകളില്‍ നിറഞ്ഞു നിന്ന അദ്ദേഹം പിന്നീട് മമ്മൂട്ടി, മോഹന്‍ലാല്‍ തുടങ്ങിയ സൂപ്പര്‍സ്റ്റാറുകള്‍ക്കൊപ്പവും അഭിനയിച്ചിട്ടുണ്ട്.

ഒരു നടനെന്ന നിലയില്‍ തനിക്ക് മോഹന്‍ലാലിനെയും അദ്ദേഹത്തിന്റെ അഭിനയവും ഒരുപാട് ഇഷ്ടമാണെന്ന് പറയുകയാണ് മധു. ഓരോ തലമുറകള്‍ മാറി വരുമ്പോള്‍ പുതിയ തലമുറ മുമ്പത്തേതിനേക്കാള്‍ മെച്ചമായി വരുമെന്നും ആ കൂട്ടത്തില്‍ ഒരാളാണ് മോഹന്‍ലാലെന്നും നടന്‍ കൂട്ടിച്ചേര്‍ത്തു.

മൂവി വേള്‍ഡ് മീഡിയക്ക് നല്‍കിയ അഭിമുഖത്തില്‍ സംസാരിക്കുകയായിരുന്നു മധു. വളരെ മികച്ച നടനാണെന്ന് സ്വയം തെളിയിച്ച നടനാണ് മോഹന്‍ലാലെന്നും അതേസമയം വളരെ ഫ്ളക്സിബിളാണെന്നും മധു പറയുന്നു.

‘ഒരു നടന്‍ എന്ന നിലയില്‍ എനിക്ക് ലാലിനെ ഒരുപാട് ഇഷ്ടമാണ്. അഭിനയവും ഇഷ്ടമാണ്. ഓരോ തലമുറകള്‍ മാറി വരുമ്പോള്‍ പുതിയ തലമുറ മുമ്പത്തേതിനേക്കാള്‍ മെച്ചമായി വരുമെന്ന് പറയുമല്ലോ. ആ കൂട്ടത്തില്‍ ഒരാളാണ് ലാല്‍. അവന്‍ കൊമേര്‍ഷ്യല്‍ ആയ ഒരുപാട് സിനിമകളില്‍ അഭിനയിച്ചിട്ടുണ്ട്.

അടിപിടിയും അക്രമവും ഡാന്‍സുമൊക്കെയുള്ള സിനിമകളില്‍ ലാല്‍ അഭിനയിച്ചിട്ടുണ്ട്. അതേസമയം, ഏത് പടമെടുത്ത് നോക്കിയാലും അതില്‍ എന്തെങ്കിലും ശരിക്കും അഭിനയിക്കാനുണ്ടാകും. പ്രേമിക്കുകയും മരംചുറ്റി ഓടുകയും അടികൂടുകയുമൊക്കെ ചെയ്യുന്നതല്ലാതെ മറ്റ് നല്ല കഥാപാത്രങ്ങളും ഉണ്ടാകും.

വളരെ മികച്ച നടനാണെന്ന് സ്വയം തെളിയിച്ച നടന്‍ കൂടെയാണ് മോഹന്‍ലാല്‍. അതേസമയം വളരെ ഫ്ളക്സിബിള്‍ കൂടെയാണ്. സൂപ്പര്‍സ്റ്റാറിന്റെ വിലയും കയ്യിലുണ്ട്. ബെസ്റ്റ് ആക്ടറിന്റെ സംഭവമുണ്ട്,’ മധു പറയുന്നു.

Content Highlight: Actor Madhu Talks About Mohanlal