സണ്ണി ഇനി സ്‌പെയിനിലേക്ക്; കലേല ചലച്ചിത്ര മേളയിലേക്ക് തെരഞ്ഞെടുക്കപെട്ട് രഞ്ജിത് ശങ്കര്‍-ജയസൂര്യ ചിത്രം
എന്റര്‍ടെയിന്‍മെന്റ് ഡെസ്‌ക്
Monday, 27th September 2021, 6:23 pm
ജയസൂര്യയെ നായകനാക്കി സംവിധായകന്‍ രഞ്ജിത്ത് ശങ്കര്‍ അണിയിച്ചൊരുക്കിയ ചിത്രമാണ് സണ്ണി. സെപ്റ്റംബര്‍ 23ന് സിനിമ ആമസോണ്‍ പ്രൈം വഴി റിലീസ് ചെയ്തിരുന്നു.
മികച്ച പ്രതികരണവും പ്രേക്ഷകപ്രീതിയും നേടിയ ചിത്രം മുന്നേറുകയാണ്. ഇതിനിടെ സ്‌പെയിനിലെ കലേല ചലച്ചിത്രമേളയിലേക്ക് സണ്ണി തെരഞ്ഞെടുക്കപ്പെട്ടിരിക്കുകയാണ്.
ഇന്ത്യയില്‍ നിന്നും ഈ ചലച്ചിത്രമേളയിലേക്ക് തെരഞ്ഞെടുക്കപ്പെട്ട ഒരേയൊരു സിനിമ കൂടിയാണ് സണ്ണി. സ്‌പെയിനിലെ കാറ്റലോനിയയില്‍ വച്ച് ഒക്ടോബര്‍ 1 മുതല്‍ ഒക്ടോബര്‍ 9 വരെയാണ് മേള സംഘടിപ്പിക്കുന്നത്.
കൊവിഡിന്റെ പശ്ചാത്തലത്തില്‍ കഥ പറയുന്ന സിനിമയില്‍ ജയസൂര്യയുടെ സണ്ണി എന്ന ടൈറ്റില്‍ കഥാപാത്രം മാത്രമാണ് പ്രത്യക്ഷപ്പെടുന്നത് എന്ന പ്രത്യേകതയുമുണ്ട്. മറ്റ് കഥാപാത്രങ്ങള്‍ ശബ്ദങ്ങളിലൂടെയാണ് വന്നു പോകുന്നത്.
