ജൂഡ് ആന്തണി ജോസഫിന്റെ സംവിധാനത്തിലൊരുങ്ങിയ 2018 എവരിവണ്‍ ഈസ് എ ഹീറോയുടെ ട്രെയ്‌ലര്‍ പുറത്ത്. 2018ല്‍ കേരളം ഒന്നിച്ച് നേരിട്ട പ്രളയത്തെ അടിസ്ഥാനമാക്കിയാണ് ചിത്രം ഒരുക്കിയിരുന്നത്. വര്‍ഷങ്ങള്‍ക്ക് മുമ്പുള്ള ദുരിതകാലത്തേയും ഭീതിയേയും ഒപ്പം കൂട്ടായ രക്ഷാപ്രവര്‍ത്തനത്തേയും അനുസ്മപരിപ്പിക്കും വിധമാണ് ട്രെയ്‌ലര്‍ തയാറാക്കിയിരിക്കുന്നത്.
ട്രെയ്‌ലര്‍ പുറത്ത് വന്നതിന് പിന്നാലെ സോഷ്യല്‍ മീഡിയയിലാകെ വലിയ ചര്‍ച്ചയാവുകയാണ്. കുഞ്ചാക്കോ ബോബന്‍, ടൊവിനോ തോമസ്, വിനീത് ശ്രീനിവാസന്‍, ആസിഫ് അലി, ഇന്ദ്രന്‍സ്, ലാല്‍, അപര്‍ണ ബാലമുരളി, ഗൗതമി നായര്‍, ശിവദ തുടങ്ങിയ വലിയ താരനിര തന്നെ സിനിമയുടെ ഭാഗമാകുന്നുണ്ട്. കലൈയരസന്‍, നരേന്‍, ലാല്‍, ഇന്ദ്രന്‍സ്, അജു വര്‍ഗീസ്, തന്‍വി റാം, ശിവദ, ഗൗതമി നായര്‍ എന്നിവരും ചിത്രത്തില്‍ പ്രധാന വേഷത്തില്‍ എത്തുന്നുണ്ട്. മെയ് അഞ്ചിന് ചിത്രം തിയേറ്ററുകളിലേക്കെത്തും.
മൂന്ന് വര്‍ഷം മുന്‍പാണ് ഈ സിനിമ പ്രഖ്യാപിച്ചത്. ചിത്രം പ്രഖ്യാപിക്കുമ്പോള്‍ സിനിമയ്ക്ക് 2403 ഫീറ്റ് എന്നായിരുന്നു പേര് നല്‍കിയിരുന്നത്. പിന്നീട് ഇത് മാറ്റുക ആയിരുന്നു. കാവ്യാ ഫിലിംസ്, പി.കെ. പ്രൈം പ്രൊഡക്ഷന്‍ എന്നീ ബാനറുകളില്‍ വേണു കുന്നപ്പള്ളി, സി.കെ. പദ്മകുമാര്‍, ആന്റോ ജോസഫ് എന്നിവരാണ് ചിത്രം നിര്‍മിക്കുന്നത്.
ജൂഡ് ആന്റണി ജോസഫും അഖില്‍ പി ധര്‍മജനും ചേര്‍ന്നാണ് ചിത്രത്തിന് തിരക്കഥ ഒരുക്കുന്നത്. ഛായാഗ്രഹണം- അഖില്‍ ജോര്‍ജ്, സംഗീതം- നോബിന്‍ പോള്‍, സൗണ്ട് ഡിസൈന്‍- വിഷ്ണു ഗോവിന്ദ്, എഡിറ്റിങ് മഹേഷ് നാരായണന്‍.
Content Highlight: 2018 EVERYONE IS A HERO TRAILER
