ജിഹാദ് ഗ്രൂപ്പില്‍ നിന്ന് പരിശീലനം ലഭിച്ചയാള്‍ രാജ്യസുരക്ഷയുടെ കാവലാളാകുന്നു, എമ്പുരാനില്‍ പൃഥ്വിരാജിനെ വിമര്‍ശിച്ച് സീരിയല്‍ നടനും ബി.ജെ.പി. പ്രവര്‍ത്തകനുമായ വിവേക് ഗോപന്‍
എമ്പുരാന്റെ വിവാദം കൊടുമ്പിരി കൊണ്ടിരിക്കുമ്പോള്‍ ചിത്രത്തെയും സംവിധായകന് പൃഥ്വിരാജിനെയും വിമര്‍ശിച്ച് രംഗത്തെത്തിയിരിക്കുകയാണ് സീരിയല്‍ നടനും ബി.ജെ.പി പ്രവര്‍ത്തകനുമായ വിവേക് ഗോപന്‍. തന്റെ ഫേസ്ബുക്ക് പേജിലൂടെയാണ് വിവേക് പ്രതികരിച്ചത്. റിലീസ് ദിവസം തന്നെ റിവ്യൂ ഒന്നും നോക്കാതെയാണ് താന്‍ സിനിമ കണ്ടതെന്ന് വിവേക് ഗോപന്‍ പറഞ്ഞു.
സിനിമയെ സിനിമയായി കാണണമെന്നാണ് എല്ലാവരും പറയുന്നതെന്നും എന്നാല്‍ സാങ്കൽപ്പിക കഥകള്‍ വരുംപോലെയല്ല ചരിത്രസംഭവങ്ങള്‍ അഭ്രപാളിയില്‍ എത്തുമ്പോഴെന്നും വിവേക് കൂട്ടിച്ചേര്‍ത്തു. സ്വാതന്ത്ര്യ സമരത്തില്‍ ഭഗത് സിങ് പങ്കെടുത്തിരുന്നില്ലെന്ന് കാണിച്ചുകൊണ്ട് ഭാവിയില്‍ ഒരു സിനിമ വന്നാല്‍ അതിനെ ആവിഷ്‌കാരസ്വാതന്ത്ര്യമായി കാണാന്‍ സാധിക്കുമോ എന്ന് വിവേക് ചോദിച്ചു.
ഗോദ്രയില്ലെങ്കില്‍ ഗുജറാത്ത് ഇല്ലെന്നും ഗോദ്രയെ കാണിക്കാതെ ഗുജറാത്ത് മാത്രം കാണിക്കാന്‍ മാത്രം നിഷ്‌കളങ്കനല്ല പൃഥ്വിരാജെന്നും വിവേക് തന്റെ കുറിപ്പില്‍ പറയുന്നുണ്ട്. പ്രധാന വില്ലന് ബജ്‌രംഗി എന്ന പേര് നല്‍കിയതും ഭാരതത്തിന്റെ ഭരണചക്രം തിരിക്കുന്നവരെ തേജോവധം ചെയ്തതും രാഷ്ട്രത്തിന്റെ മാനസികാവസ്ഥയെ അസ്ഥിരപ്പെടുത്താനുമാണ് ചരിത്രത്തെ വളച്ചൊടിച്ചതെന്നും വിവേക് പറയുന്നു.
ജിഹാദി ടെറര്‍ ഗ്രൂപ്പില്‍ നിന്ന് പരിശീലനം ലഭിച്ചയാള്‍ രാജ്യസുരക്ഷയുടെ കാവലാളാകുന്നത് കാണിച്ചതിലൂടെ പൃഥ്വിരാജ് ഭീകരവാദത്തെ വെള്ള പൂശുകയാണെന്നും വിവേക് ഗോപന്‍ ആരോപിക്കുന്നുണ്ട്. 17 കട്ടുകള്‍ ചെയ്യേണ്ടി വന്നതിലൂടെ എമ്പുരാന്റെ അണിയറപ്രവര്‍ത്തകര്‍ ചരിത്രത്തെ വളച്ചൊടിച്ചു എന്നത് വ്യക്തമായെന്നും വിവേക് ഗോപന്‍ പറയുന്നു.
സ്ക്രിപ്റ്റ് ആദ്യം വ്യക്തമായി വായിച്ചിട്ടില്ല എന്ന പേരില്‍ മോഹന്‍ലാല്‍ നടത്തിയ ഖേദപ്രകടനം ആദ്യം നടത്തേണ്ടത് പൃഥ്വിരാജാണെന്നും വിവേക് ഗോപന്‍ കൂട്ടിച്ചേര്‍ത്തു. എമ്പുരാന്‍ സെന്‍സറിങ്ങിന് വന്നപ്പോള്‍ നീതിപൂര്‍വം സെന്‍സര്‍ ചെയ്യാതെ അപ്പ്രൂവ് ചെയ്ത സെന്‍സര്‍ ബോര്‍ഡ് സമൂഹത്തോട് അനീതി കാട്ടിയെന്നും വിവേക് കുറിപ്പില്‍ പറയുന്നു.
ഒരു കലാപമായി മാറാന്‍ സാധ്യതയുണ്ടായിരുന്ന വിഷയത്തെ സമചിത്തതയോടെ കൈകാര്യം ചെയ്ത ഭൂരിപക്ഷ സമുദായവും ന്യൂനപക്ഷ സമുദായവും കലാപ സാധ്യതയെ നിഷ്പ്രഭമാക്കിയെന്നും വിവേക് ഗോപന്‍ പറഞ്ഞു. എന്നാല്‍ ഇതൊന്നും രാജ്യം ഭരിക്കുന്ന നരേന്ദ്ര മോദിയെയും അമിത് ഷായെയും ഒട്ടും ഉലക്കില്ലെന്ന് പറഞ്ഞുകൊണ്ടാണ് വിവേക് ഗോപന്‍ കുറിപ്പ് അവസാനിപ്പിക്കുന്നത്.
കുറിപ്പിന്റെ പൂര്‍ണരൂപം
ഞാൻ ആദ്യദിനം തന്നെ ഒരു റിവ്യൂവിന്റെയും പിൻബലം ഇല്ലാതെ എമ്പുരാൻ കണ്ടു.
“സിനിമയെ സിനിമയായി കാണണം, ഇത് ആവിഷ്കാര സ്വാതന്ത്ര്യം ആണ്”. പൃഥ്വിരാജ് സംവിധാനം ചെയ്ത മോഹൻലാൽ ചിത്രത്തിന്റെ ഉള്ളടക്കം ചർച്ചയാകുമ്പോൾ കേൾക്കുന്ന വാക്യമാണിത്.. അതെ സിനിമയെ സിനിമയായി കാണണം..പക്ഷേ..
സാങ്കൽപ്പിക കഥകൾ സിനിമയായി വരും പോലെയല്ല ചരിത്ര സംഭവങ്ങൾ അഭ്രപാളിയിൽ എത്തുമ്പോൾ. സ്വാതന്ത്ര്യ സമര ചരിത്രത്തിൽ ഭഗത് സിംഗ് പങ്കെടുത്തിട്ടില്ല എന്ന് വരുത്തി തീർക്കുന്ന സിനിമയുമായി ആരെങ്കിലും വന്നാൽ സാമാന്യബോധമുള്ള ജനതയ്ക്ക് അത് അംഗീകരിക്കാൻ കഴിയില്ല.. അതുപോലെ ഗോദ്ര ഇല്ലെങ്കിൽ ഗുജറാത്ത് ഇല്ല എന്നതും വസ്തുതയാണ്..അല്ലെങ്കിൽ ഗോദ്ര സംഭവവും ഗുജറാത്ത് കലാപവും ഒന്നുപോലെ കാണിക്കാൻ മതേതര ജനാധിപത്യ ബോധമുള്ളവർ എന്ന് അവകാശപ്പെടുന്ന പൃഥ്വിരാജ് അടക്കമുള്ളവർ തയ്യാറാകേണ്ടതല്ലേ?
ഗോദ്രയെ മറന്ന് ഗുജറാത്ത് മാത്രം കാണിക്കുന്നത് അത് അത്ര നിഷ്കളങ്കമാണെന്നും ഈ ചരിത്രം അറിയാത്ത ആളാണ് പൃഥ്വിരാജ് എന്നും പറയാൻ കഴിയില്ല..ഈ സിനിമയിലെ വില്ലൻ കഥാപാത്രത്തിന് ബജരംഗി എന്ന പേര് നൽകിയതും യാദൃശ്ചികം അല്ല.ഭാരതത്തിന്റെ ഭരണ യന്ത്രം തിരിക്കുന്നവരെ ഉൾപ്പെടെ തേജോവധം ചെയ്യുകയും ശാന്തമായി നിലനിന്നു പോകുന്ന ഈ രാഷ്ട്രത്തിന്റെ മാനസികാവസ്ഥയെ അസ്ഥിരപ്പെടുത്താനുമാണ് ഇത് വളച്ചൊടിച്ചത് എന്ന് ആരെങ്കിലും സ്വാഭാവികമായും സംശയിച്ചാൽ കുറ്റം പറയാൻ ആകുമോ?
ജിഹാദ് ടെറർ ഗ്രൂപ്പിൽ നിന്നു പരിശീലനം സിദ്ധിച്ചു വന്ന ഒരാൾ രാജ്യസുരക്ഷയ്ക്ക് കാവലാളാകും എന്ന് വരുത്തുന്ന തരത്തിലുള്ള ഭീകരവാദത്തെ വെള്ളപൂശുന്ന ഭാഗം കൂടി ചിത്രീകരിച്ചിരിക്കുന്നത് നമുക്ക് ഇവിടെ കാണാം.ഇതിലൂടെ എന്ത് സന്ദേശമാണ് ഇവർ നൽകുന്നത്?പക്ഷേ ഇതിനൊക്കെ എതിരെയുള്ള പ്രതിഷേധം രേഖപ്പെടുത്തിയതും വളരെ ശ്രദ്ധേയമായി എടുത്തു പറയേണ്ടതാണ്.
* ടിപി 51 എന്ന സിനിമ എടുത്ത സംവിധായകന് പാതിരാത്രിയിൽ പിഞ്ചുകുഞ്ഞുങ്ങളുമായി താൻ താമസിച്ച വീട് വിട്ട് കണ്ണൂരിൽ നിന്ന് മാറി താമസിക്കേണ്ടി വന്നതുപോലെ പൃഥ്വിരാജിന് ഉണ്ടായില്ല
*ലെഫ്റ്റ് ആൻഡ് റൈറ്റ് സിനിമ പ്രദർശിപ്പിച്ചപ്പോൾ തിയറ്റർ കത്തിക്കാൻ ചിലർ ചെന്ന പോലെ ആരും ഇവിടെ തയ്യാറായില്ല.
*കേരള സ്റ്റോറി പ്രദർശന സമയത്ത് കാട്ടിയ ഗുണ്ടായിസം പോലെ ഒരു കാര്യത്തിനും ആരും മുതിർന്നില്ല.
* ചുരുക്കത്തിൽ പറഞ്ഞാൽ ചിലർ ആഗ്രഹിച്ച പോലെ ഇവിടെ കലാപം ഉണ്ടായില്ല.
സഹിഷ്ണുതയോടെ പ്രതിഷേധം രേഖപ്പെടുത്തി നിയമപരമായി നേരിട്ടു അതിൻറെ ഫലമായി തമ്പുരാന് 17 ഓളം കട്ടുകൾ ചെയ്യേണ്ടിവന്നു എങ്കിൽ ചരിത്രത്തെ ഏകപക്ഷീയമായി വളച്ചൊടിച്ചു എന്ന ബോധ്യം ഈ സിനിമയുടെ അണിയറ പ്രവർത്തകർക്ക് ഉണ്ടായി എന്നതല്ലേ സത്യം?
അങ്ങനെയെങ്കിൽ സ്ക്രിപ്റ്റ് കൃത്യമായി വായിച്ചിട്ടില്ല എന്ന് പറഞ്ഞിട്ടും മോഹൻലാൽ എന്ന വ്യക്തിത്വം സാമാന്യ മര്യാദയുടെ പേരിൽ ഇന്ത്യൻ പൗരൻ എന്ന നിലയിൽ പ്രകടിപ്പിച്ച ഖേദപ്രകടനം സത്യത്തിൽ ആദ്യം ചെയ്യേണ്ടത് എല്ലാകാര്യത്തിലും പ്രതികരിക്കുമെന്ന് അവകാശപ്പെടുന്ന പൃഥ്വിരാജ് അല്ലേ?
ഇതിനിടയിലും മറ്റൊരു കാര്യം വിസ്മരിച്ചു കൂടാ ഈ ചിത്രം സെൻസറിംഗിന് വന്നപ്പോൾ അതിനെ നീതിപൂർവ്വം സെൻസർ ചെയ്യാതെ അപ്പ്രൂവ് ചെയ്ത സെൻസർ ബോർഡ് ഈ സമൂഹത്തോട് കാട്ടിയത് അനീതി തന്നെയാണ്.കുറച്ചുകാലം സെൻസർ ബോർഡ് അംഗമെന്ന നിലയിൽ പ്രവർത്തിച്ച വ്യക്തിയെന്ന നിലയിൽ സെൻസർ ബോർഡിനോടുള്ള പ്രതിഷേധം കൂടിയാണ് ഈ കുറിപ്പ്.
ഒരു കലാപമായി മാറാൻ വരെ സാധ്യതയുണ്ടായിരുന്ന വിഷയത്തെ സമചിത്തതയോടെ കൈകാര്യം ചെയ്ത ഭൂരിപക്ഷ സമൂഹവും ജനാധിപത്യ പ്രതിഷേധത്തെ അതേ അർത്ഥത്തിൽ എടുത്ത ന്യൂനപക്ഷ സമൂഹവും ചേർന്ന് കലാപ സാധ്യതയെ നിഷ്പ്രഭമാക്കി എന്നതും വസ്തുതയാണ്..
ഇതിലൂടെ ഒന്നും പുരോഗതിയിൽ നിന്ന് പുരോഗതിയിലേക്ക് അനുദിനം ഈ രാഷ്ട്രത്തെ കൈപിടിച്ച് നടത്തുന്ന നരേന്ദ്രമോദിജി, അമിത്ഷാ ജി ഉൾപ്പെടെയുള്ളവരുടെ നിശ്ചയദാർഢ്യം തെല്ലൊന്നുലയ്ക്കാനും സാധ്യമല്ല എന്ന് പറയാതെ വയ്യ..
Content Highlight: Vivek Gopan criticizing Prithviraj in Empuraan controversy
