പറവയ്ക്ക് ശേഷം സൗബിനും ദുല്‍ഖറും വീണ്ടും ഒന്നിക്കുന്നു; ചിത്രത്തിന്റെ ടൈറ്റില്‍ പോസ്റ്റര്‍ പുറത്ത്
എന്റര്‍ടെയിന്‍മെന്റ് ഡെസ്‌ക്
Wednesday, 28th July 2021, 10:03 pm
കൊച്ചി: സൂപ്പര്‍ഹിറ്റ് ചിത്രം പറവക്ക് ശേഷം സൗബിന്‍ ഷാഹിറും ദുല്‍ഖര്‍ സല്‍മാനും വീണ്ടും ഒന്നിക്കുന്നു. ദുല്‍ഖറിന്റെ പിറന്നാള്‍ ദിനത്തിലാണ് ഈ വാര്‍ത്ത പുറത്തുവന്നത്.
ഓതിരം കടകം എന്ന് പേരിട്ടിരിക്കുന്ന ചിത്രത്തിന്റെ നിര്‍മാണം ദുല്‍ഖര്‍ സല്‍മാന്റെ ഉടമസ്ഥതയിലുള്ള വേഫെറര്‍ ഫിലിംസ് തന്നെയാണ് നിര്‍വഹിക്കുന്നത്. ചിത്രത്തെ കുറിച്ചുള്ള കൂടുതല്‍ വിവരങ്ങള്‍ പുറത്തു വിട്ടിട്ടില്ല.
2017ലാണ് ദുല്‍ഖറും സൗബിനും ഒന്നിച്ച പറവ റീലീസ് ചെയ്തത്. പറവയില്‍ അതിഥി താരമായാണ് ദുല്‍ഖര്‍ എത്തിയത്. ഷെയ്ന്‍ നിഗമായിരുന്നു പറവയില്‍ നായകനായിരുന്നത്.
അതേസമയം ജോഷിയുടെ മകന്‍ അഭിലാഷ് ജോഷി സംവിധാനം ചെയ്യുന്ന സിനിമയിലും ദുല്‍ഖറാണ് നായകന്‍. ചിത്രത്തിന്റെ ടൈറ്റില്‍ പോസ്റ്റര്‍ പുറത്തുവിട്ടിട്ടുണ്ട്. കിംഗ് ഓഫ് കൊത്ത എന്നാണ് ചിത്രത്തിന് പേരിട്ടിരിക്കുന്നത്.
