ഈ രാജ്യത്ത് എന്താണ് സംഭവിച്ചുകൊണ്ടിരിക്കുന്നത്?, ഫോണ്‍ ചോര്‍ത്താന്‍ ആരാണ് നിര്‍ദേശം നല്‍കിയത്?; ചത്തീസ്ഗഡ് സര്‍ക്കാരിനെതിരെ സുപ്രീംകോടതിയുടെ രൂക്ഷവിമര്‍ശനം
ഐ.പി.എസ് ഉദ്യോഗസ്ഥന്റെയും കുടുംബത്തിന്റെയും ഫോണ്‍വിവരങ്ങള്‍ചോര്‍ത്തിയതില്‍ ചത്തീസ്ഗഡ് സര്‍ക്കാരിനെതിരെ രൂക്ഷവിമര്‍ശനവുമായി സുപ്രീംകോടതി. ആര്‍ക്കും ഒരു സ്വകാര്യതയും ഇല്ലാതായിരിക്കുകയാണെന്നും സുപ്രീംകോടതി വിലയിരുത്തി.
എങ്ങനെയാണ് ഒരു പൗരന്റെ സ്വകാര്യത ഈ രീതിയില്‍ ലംഘിക്കപ്പെട്ടതെന്നും കോടതി ചോദിച്ചു.
ആരാണ് ഫോണ്‍വിവരങ്ങള്‍ ചോര്‍ത്താന്‍ നിര്‍ദ്ദേശം നല്‍കിയതെന്ന കാര്യം അന്വേഷിച്ച് വിശദമായ സത്യവാങ്മൂലം സമര്‍പ്പിക്കാനും ജസ്റ്റിസ് അരുണ്‍ മിശ്രയും ഇന്ദിരാ ബാനര്‍ജിയുമടങ്ങിയ ബഞ്ച് ഉത്തരവിട്ടു.
“ഇത് ചെയ്യേണ്ട എന്ത് കാര്യമായിരുന്നു ഉണ്ടായിരുന്നത്?. ആര്‍ക്കും ഒരു സ്വകാര്യതയും ഇല്ലാതായിരിക്കുകയാണല്ലോ. ഈ രാജ്യത്ത് എന്താണ് സംഭവിച്ചുകൊണ്ടിരിക്കുന്നത്?”, സുപ്രീംകോടതി ബഞ്ച് ചോദിച്ചു.
2015ലാണ് സിവില്‍ സപ്ലൈസ് അഴിമതി അന്വേഷണവുമായി ബന്ധപ്പെട്ട് ഗുപ്തയുടെ ഫോണ്‍ ചോര്‍ത്തിയത്. ഗുപ്തയ്‌ക്കെതിരെ അന്വേഷണം നടത്തുന്നത് സ്റ്റേ ചെയ്ത ഉത്തരവ് നിലനില്‍ക്കുന്നുണ്ടെന്നും സുപ്രീംകോടതി പറഞ്ഞു.
