കോഴിക്കോട്: മുഖാവരണം നിരോധിച്ചുകൊണ്ടുള്ള തീരുമാനത്തില്‍ നിന്ന് ഫസല്‍ ഗഫൂര്‍ പിന്മാറണമെന്നും അല്ലാത്തപക്ഷം അതിനെ എന്തു വിലകൊടുത്തും നേരിടുമെന്നും സമസ്ത നേതാക്കള്‍. കോഴിക്കോട്ട് നടത്തിയ വാര്‍ത്താസമ്മേളത്തിലാണ് എം.ഇ.എസിന്റെ സ്ഥാപനങ്ങളില്‍ വരുന്ന അധ്യയനവര്‍ഷം മുതല്‍ മുഖാവരണം നിരോധിച്ചുകൊണ്ടുള്ള സര്‍ക്കുലറിനെതിരായ നിലപാട് അവര്‍ ആവര്‍ത്തിച്ചത്.
‘മതപണ്ഡിതന്മാര്‍ക്കെതിരേ ഫസല്‍ ഗഫൂര്‍ നടത്തുന്ന പരാമര്‍ശങ്ങള്‍ അതിരുകടക്കുന്നുണ്ട്. ഇതു തുടര്‍ന്നാല്‍ മുസ്‌ലിം സമുദായം നോക്കിനില്‍ക്കില്ല. ഇഷ്ടമുള്ള വസ്ത്രങ്ങള്‍ ധരിക്കാന്‍ എല്ലാവര്‍ക്കും അവകാശമുണ്ട്. അത് ഓരോരുത്തരുടെയും വ്യക്തിസ്വാതന്ത്ര്യമാണ്. അതനുവദിച്ചുകൊണ്ടു സ്ഥാപനങ്ങള്‍ നടത്താന്‍ എം.ഇ.എസ് മുന്നോട്ടുവരണം. സമസ്ത പ്രസ്താവനകള്‍ നിര്‍ത്തണമെന്നാണു കഴിഞ്ഞദിവസം ഫസല്‍ ഗഫൂര്‍ പറഞ്ഞത്. സമസ്തയെ വിലക്കാന്‍ ഫസല്‍ ഗഫൂറിന് അധികാരമില്ല. ഇക്കാര്യം മനസ്സിലാക്കി വേണം പ്രവര്‍ത്തിക്കാന്‍.
