തെന്നിന്ത്യന്‍ താരമാണെങ്കിലും മലയാളികള്‍ക്ക് ഏറെ പ്രിയപ്പെട്ട നടിയാണ് സാമന്ത. സാമന്തയുടെ ഓരോ പോസ്റ്റുകള്‍ക്കും ആരാധകര്‍ ഏറെയാണ്. സോഷ്യല്‍ മീഡിയയില്‍ ആരാധകരുമായി സംവദിക്കാനും താരം സമയം കണ്ടെത്താറുണ്ട്.
സിനിമയുടേയും തന്റെ യാത്രകളുടേയുമെല്ലാം വിശേഷങ്ങള്‍ സാമന്ത ആരാധകര്‍ക്കായി പങ്കുവെക്കാറുണ്ട്. ഇത്തരത്തില്‍ തന്റെ ഒരു മനോഹരമായ പെയിന്റിങ് ചിത്രമാണ് ഇപ്പോള്‍ താരം പങ്കുവെച്ചിരിക്കുന്നത്.
കൊവിഡ് 19 ബാധിച്ചവരെ പിന്തുണച്ച് ഉള്ള ഒരു ആര്‍ട് പ്രൊജക്റ്റിന്റെ ഭാഗമാകുകയായിരുന്നു സാമന്ത. ആ ദിവസങ്ങളില്‍, നിങ്ങള്‍ക്ക് പെയിന്റ് ചെയ്യാന്‍ കഴിയില്ല എന്ന് നിങ്ങള്‍ക്ക് തോന്നുന്നെങ്കില്‍ എല്ലാ വിധത്തിലും പെയിന്റ് ചെയ്യുക. ആ തോന്നല്‍ ഇല്ലാതാകും എന്നാണ് സാമന്ത ഫോട്ടോയ്ക്ക് ക്യാപ്ഷനായി എഴുതിയിരിക്കുന്നത്. നിരവധി പേരാണ് താരത്തിന്റെ പോസ്റ്റിനെ പിന്തുണച്ച് എത്തിയത്.
നാഗചൈതന്യയുമായി വേര്‍പിരിഞ്ഞതിനെ പിന്നാലെ താരം കടുത്ത സമ്മര്‍ദ്ദത്തിലൂടെയാണ് കടന്നുപോകുന്നതെന്ന റിപ്പോര്‍ട്ടുകളുണ്ടായിരുന്നു. നഷ്ടപ്രണയത്തിന്റേതായ ചില വരികളും അടുത്തിടെ താരം സോഷ്യല്‍ മീഡിയയില്‍ പങ്കുവെച്ചിരുന്നു.
‘നഷ്ടപ്രണയത്തിന്റെ ഗാനങ്ങള്‍…. പര്‍വതങ്ങളിലും പാറക്കെട്ടുകളിലും കുന്നിന്‍ ചരിവുകളിലും തഴുകിവരുന്ന തണുത്തു മരവിച്ച കാറ്റിന്റെ ശബ്ദം… നഷ്ടപ്പെട്ടതും തിരിച്ചുകിട്ടിയതുമായ ചിത്രങ്ങളുടെ പാട്ടുകള്‍… താഴ്വരയില്‍ അലയടിക്കുന്ന നഷ്ടപ്രണയത്തിന്റെ വിഷാദഗാനം… പഴയ ബംഗ്ലാവുകളുടെ പടവുകളിലും ഇടവഴികളിലും കാറ്റ് മുഴങ്ങുകയാണ്,’ എന്നായിരുന്നു സാമന്ത കുറിച്ചത്.
2017 ഒക്ടോബറില്‍ വിവാഹിതരായ സാമന്തയും നാഗചൈതന്യയും നാലാം വിവാഹ വാര്‍ഷികത്തിന് ദിവസങ്ങള്‍ മാത്രം ബാക്കി നില്‍ക്കെയാണ് വേര്‍പിരിയുകയാണെന്ന് അറിയിച്ചത്. ഏറെ നാളായി ഇരുവരും തമ്മില്‍ യോജിപ്പിലല്ലെന്ന റിപ്പോര്‍ട്ടുകള്‍ ഉണ്ടായിരുന്നെങ്കിലും വിവാഹ മോചന വാര്‍ത്ത ഞെട്ടലോടെയായിരുന്നു ആരാധകര്‍ കേട്ടത്.
ജീവിത പങ്കാളികള്‍ എന്ന നിലയില്‍ തങ്ങള്‍ വേര്‍പിരിയുകയാണെന്നും ഏതാണ്ട് പത്ത് വര്‍ഷത്തിലധികമായി തമ്മിലുള്ള സൗഹൃദം ഇനിയും നിലനില്‍ക്കുമെന്ന് പ്രതീക്ഷിക്കുന്നതായും വിവാഹമോചന വാര്‍ത്തയില്‍ സ്ഥിരീകരണം അറിയിച്ച് താരങ്ങള്‍ പങ്കുവച്ച കുറിപ്പിലൂടെ വ്യക്തമാക്കിയിരുന്നു.
ജീവിതത്തിലെ പ്രതിസന്ധി ഘട്ടങ്ങളെ തരണം ചെയ്ത് സിനിമയില്‍ സജീവമാകുകയാണ് താരം. സാമന്ത നായികയായിട്ടുള്ള ചില ചിത്രങ്ങള്‍ അടുത്തിടെ പ്രഖ്യാപിക്കുകയും ചെയ്തിരുന്നു. സാമന്ത നായികയാകുന്ന ഒരു ചിത്രം നിര്‍മിക്കുന്നത് ഡ്രീം വാരിയര്‍ പിക്‌ചേഴ്‌സ് ആണ്. ശന്തരുബന്‍ ആണ് സാമന്തയുടെ ചിത്രം സംവിധാനം ചെയ്യുന്നത്.
