തമിഴ് പശ്ചാത്തലമാണെന്നും നായകന്‍ ധ്യാനാണെന്നും ഞാന്‍ ആരോടും പറഞ്ഞിട്ടില്ല; വാര്‍ത്ത എഴുതിയവരുടെ മനോധര്‍മം പോലെ ചെയ്തതാകാം: എസ്.എന്‍. സ്വാമി
എന്റര്‍ടെയിന്‍മെന്റ് ഡെസ്‌ക്
Friday, 7th April 2023, 7:50 pm
ധ്യാന്‍ ശ്രീനിവാസനുമായി സിനിമ ചെയ്യുന്നുവെന്ന വാര്‍ത്ത വ്യാജമാണെന്ന് തിരക്കഥാകൃത്ത് എസ.്എന്‍. സ്വാമി. ഇത്തരത്തില്‍ പ്രചരിക്കുന്ന വാര്‍ത്തകളില്‍ തനിക്ക് യാതൊരുവിധ ഉത്തരാവാദിത്തവുമില്ലെന്നും അദ്ദേഹം പറഞ്ഞു. വിഷു ദിനത്തില്‍ നടക്കാനിരിക്കുന്ന ചിത്രത്തിന്റെ പൂജയിലായിരിക്കും സിനിമയെ കുറിച്ചുള്ള വിവരങ്ങള്‍ പുറത്ത് പറയുകയെന്നും അദ്ദേഹം കൂട്ടിച്ചേര്‍ത്തു.
‘എവിടെ നിന്നൊക്കെയോ ശേഖരിച്ച വിവരങ്ങളിന്മേല്‍ വന്ന വാര്‍ത്തകളാണ് ഇവ. ഞാനീ കാര്യത്തില്‍ ആരോടും പ്രതികരിച്ചിട്ടില്ല. തമിഴ് പശ്ചാത്തലമാണെന്നും ധ്യാനാണ് നായകനെന്നും എഴുതിയവരുടെ മനോധര്‍മം പോലെ ചെയ്തതാകാം. അതിനെ കുറിച്ചൊന്നും ഞാനിപ്പോള്‍ പറയുന്നില്ല,’ എസ്.എന്‍. സ്വാമി പറഞ്ഞു.
