ചെന്നൈ: മകളുടെ വിവാഹത്തിന് ആറുമാസത്തെ പരോളിന് അപേക്ഷിച്ച് രാജീവ്ഗാന്ധി വധക്കേസില്‍ ജീവപര്യന്തം തടവ ശിക്ഷ അനുഭവിക്കുന്ന എസ്. നളിനി. നിലവില്‍ വെല്ലൂര്‍ സെന്‍ട്രല്‍ ജയിലില്‍ കഴിയുന്ന നളിനി ഇത് സംബന്ധിച്ച് മദ്രാസ് ഹൈക്കോടതിയിലാണ് അപേക്ഷ നല്‍കിയത്.
ലണ്ടനില്‍ താമസിക്കുന്ന മകള്‍ ഹരിതയുടെ വിവാഹവുമായി ബന്ധപ്പെട്ടാണ് ആറുമാസത്തെ പരോളിന് നളിനി അപേക്ഷിച്ചത്. നിലവില്‍ ജീവപര്യന്തം തടവുകാര്‍ക്ക് രണ്ടുവര്‍ഷത്തില്‍ ഒരിക്കല്‍ പരോള്‍ അനുവദിക്കാറുണ്ടെന്നും എന്നാല്‍ 27 വര്‍ഷമായി തടവില്‍ കഴിയുന്ന തനിക്ക് ഇതുവരെ പരോള്‍ അനുവദിച്ചിട്ടില്ലെന്നും നളിനി തന്റെ അപേക്ഷയില്‍ പറഞ്ഞു.
കഴിഞ്ഞ 10 വര്‍ഷത്തിനിടെ 3700ല്‍ അധികം തടവുകാരെ സര്‍ക്കാര്‍ മോചിപ്പിച്ചിരുന്നെന്നും നളിനി ചൂണ്ടിക്കാട്ടി. നളിനി ഉള്‍പ്പെടെ കേസിലെ തടവുകാരെ വിട്ടയക്കണമെന്ന തമിഴ്‌നാട് സര്‍ക്കാറിന്റെ ശുപാര്‍ശ നിലവില്‍ ഗവര്‍ണറുടെ പരിഗണനയിലാണ്.
