ന്യൂദല്‍ഹി: മനുഷ്യാവകാശ നിയമ ഭേദഗതി ബില്‍ ചര്‍ച്ചയ്ക്കിടെ ഗുജറാത്തിലെ വംശഹത്യയും വ്യാജ ഏറ്റുമുട്ടലുകളം തീവ്രവാദ ആക്രമണങ്ങളും ഉയര്‍ത്തിക്കാട്ടി രാജ്യസഭയില്‍ കോണ്‍ഗ്രസ് നേതാവ് മധുസൂദനന്‍ മിസ്ത്രിയുടെ പ്രസംഗം. ഗുജറാത്തിലെ 50 ലേറെ ഏറ്റുമുട്ടലുകള്‍ നടന്നത് ഒരു പൊലീസ് ഓഫീസറുടെ കാലത്താണെന്നും ആ പൊലീസ് ഓഫീസര്‍ ജയിലില്‍ പോയശേഷം ഗുജറാത്തില്‍ പിന്നീട് ഏറ്റുമുട്ടലുണ്ടായിട്ടില്ലെന്നും മിസ്ത്രി തുറന്നടിച്ചു.
ആഭ്യന്തര മന്ത്രി അമിത് ഷായടക്കമുള്ളവര്‍ ആരോപണം നേരിട്ട സൊഹ്‌റാബുദ്ദീന്‍ ഷെയ്ക്ക്, ഇസ്രത്ത് ജഹാന്‍ വ്യാജ ഏറ്റുമുട്ടല്‍ കേസുകളില്‍ പ്രതിപ്പട്ടികയില്‍പ്പെട്ട ഗുജറാത്തിലെ മുന്‍ ഐ.പി.എസ് ഉദ്യോഗസ്ഥന്‍ ഡി.ജി വന്‍സാരയുടെ പേര് പരോക്ഷമായി സൂചിപ്പിച്ചായിരുന്നു മിസ്ത്രിയുടെ വിമര്‍ശനം.
ഗുജറാത്തില്‍ നടന്ന തീവ്രവാദ ആക്രമണങ്ങളുമായി ബന്ധപ്പെട്ട ബി.ജെ.പി അവകാശവാദങ്ങളേയും മിസ്ത്രി പരിഹസിക്കുന്നുണ്ട്. പാക്കിസ്താനിലും ബാലാകോട്ടിലുമുള്ള തീവ്രവാദ ക്യാമ്പിനെക്കുറിച്ച് നമ്മുടെ രഹസ്യാന്വേഷണ ഏജന്‍സികളുടെ പക്കല്‍ വിവരമുണ്ട്. എന്നാല്‍ കശ്മീരില്‍ നിന്നുള്ള ആളുകള്‍ ട്രെയിനില്‍ അഹമ്മദാബാദില്‍ വന്നിറങ്ങി അവിടെ നിന്ന് റിക്ഷപിടിച്ച് ഗുജറാത്ത് മുഖ്യമന്ത്രിയുടെ വീടിനടുത്തുവന്ന് അക്ഷര്‍ധാം ക്ഷേത്രത്തിനുനേരെ ആക്രമണം നടത്തുമ്പോള്‍ ആ വിവരം മാത്രം നമ്മുടെ പക്കലില്ലെന്നു പറഞ്ഞായിരുന്നു മിസ്ത്രിയുടെ പരിഹാസം.
ഏത് സംഘടനയുടെ അംഗമാണ് എന്ന കുറിപ്പ് കീശയിലിട്ടാണ് ഈ തീവ്രവാദികളൊക്കെ ഗുജറാത്തിലേക്ക് വന്നതെന്നും മിസ്ത്രി പരിഹസിച്ചു.
