ഷാര്‍ജ: കൊല്‍ക്കത്ത നൈറ്റ് റൈഡേഴ്‌സിനെതിരായ മത്സരത്തില്‍ ബാറ്റ്‌സ്മാന്‍മാരുടെ മോശം പ്രകടനമാണ് പരാജയത്തിന് കാരണമെന്ന് ചെന്നൈ സൂപ്പര്‍ കിംഗ്‌സ് ക്യാപ്റ്റന്‍ മഹേന്ദ്രസിംഗ് ധോണി. മധ്യ ഓവറുകളില്‍ റണ്‍സ് കണ്ടെത്താനും വിക്കറ്റ് സൂക്ഷിക്കാനും ബാറ്റ്‌സ്മാന്‍മാര്‍ക്ക് കഴിഞ്ഞില്ലെന്ന് ധോണി പറഞ്ഞു.
‘രണ്ട്-മൂന്ന് ഓവറുകള്‍ കൊല്‍ക്കത്ത മനോഹരമായാണ് എറിഞ്ഞത്. ഞങ്ങള്‍ക്ക് വിക്കറ്റും നഷ്ടമായി. ആ സമയത്ത് വ്യത്യസ്തമായാണ് ഞങ്ങള്‍ ബാറ്റ് ചെയ്തിരുന്നതെങ്കില്‍ മത്സരഫലവും വ്യത്യസ്തമായേനേ’, ധോണി പറഞ്ഞു.
നാലാം നമ്പറില്‍ ധോണി ഇറങ്ങിയെങ്കിലും ചെന്നൈയ്ക്ക് സ്‌കോര്‍ ബോര്‍ഡ് ചലിപ്പിക്കാനായിരുന്നില്ല. പിന്നാലെ വന്ന കേദാര്‍ ജാദവ് 12 പന്തില്‍ ഏഴ് റണ്‍സാണെടുത്തത്. ഇതും തോല്‍വിയ്ക്ക് കാരണമായി.
അതേസമയം ബൗളര്‍മാര്‍ മികച്ച പ്രകടനമാണ് കാഴ്ചവെച്ചതെന്നും ധോണി പറഞ്ഞു. കൊല്‍ക്കത്തയെ 160 കളില്‍ ഒതുക്കാനായെന്നും എന്നാല്‍ അത് ബാറ്റ്‌സ്മാന്‍മാര്‍ക്ക് ഉപയോഗപ്പെടുത്താനായില്ലെന്നും ധോണി കുറ്റപ്പെടുത്തി.
