സ്‌കൂളുകളില്‍ വേണ്ടത്ര പാഠപുസ്തകമില്ല; ലിബിയയില്‍ വിദ്യാഭ്യാസ മന്ത്രിയെ അറസ്റ്റ് ചെയ്തു
ഡൂള്‍ന്യൂസ് ഡെസ്‌ക്
Tuesday, 21st December 2021, 12:51 pm
ട്രിപോലി: സ്‌കൂളുകളില്‍ വേണ്ടത്ര പാഠപുസ്തകങ്ങളില്ലെന്ന് കണ്ടെത്തിയതിനെത്തുടര്‍ന്ന് വടക്കന്‍ ആഫ്രിക്കന്‍ രാജ്യമായ ലിബിയയില്‍ വിദ്യാഭ്യാസ മന്ത്രിയെ അറസ്റ്റ് ചെയ്തു.
സ്‌കൂളുകളില്‍ പുസ്തങ്ങളില്ലെന്ന പരാതിയെത്തുടര്‍ന്ന് നടത്തിയ അന്വേഷണത്തിലാണ് തിങ്കളാഴ്ച മന്ത്രിയെ അറസ്റ്റ് ചെയ്തതെന്ന് പ്രോസിക്യൂഷന്‍ സര്‍വീസ് അറിയിച്ചു.
ലിബിയയുടെ വിദ്യാഭ്യാസ വകുപ്പ് മന്ത്രിയായ മൗസ അല്‍-മെഗരീഫിനെയാണ് അറസ്റ്റ് ചെയ്തത്. സംഭവത്തില്‍ അന്വേഷണം പുരോഗമിക്കുകയായതിനാല്‍ ഇദ്ദേഹത്തെ പ്രതിരോധ തടങ്കലില്‍ പാര്‍പ്പിച്ചിരിക്കുകയാണ്.
പുസ്തകങ്ങള്‍ പ്രിന്റ് ചെയ്യുന്ന സാഹചര്യവും അതിന്റെ എണ്ണത്തില്‍ വലിയ കുറവ് വരുന്നത് സംബന്ധിച്ചുമാണ് പബ്ലിക് പ്രോസിക്യൂഷന്‍ അന്വേഷണം നടത്തുന്നത്.
