മലയാളത്തിലെ മികച്ച താരജോഡികളിലൊന്നാണ് ബിജു മേനോന്‍- സംയുക്ത വര്‍മ. വെറും നാല് ചിത്രങ്ങളില്‍ മാത്രമേ ഇരുവരും ഒന്നിച്ചഭിനയിച്ചിട്ടുള്ളൂ. ഇരുവരുടെയും റൊമാന്‍സിനെപ്പറ്റി സംസാരിക്കുകയാണ് സംവിധായകന്‍ കമല്‍. മേഘമല്‍ഹാര്‍, മധുരനൊമ്പരക്കാറ്റ് എന്നീ സിനിമകള്‍ അവരെ വെച്ച് ചെയ്തിട്ടുണ്ടെന്നും മധുരനൊമ്പരക്കാറ്റിന്റെ സെറ്റില്‍ വെച്ചാണ് അവരുടെ പ്രണയം പരസ്യമായതെന്നും കമല്‍ പറഞ്ഞു.

ചിത്രത്തിന്റെ ക്ലൈമാക്‌സില്‍ കാറ്റടിക്കുന്നതിനിടയില്‍ സംയുക്തയുടെ കഥാപാത്രം സ്‌കൂളിലേക്ക് പോകുന്ന സീന്‍ ഷൂട്ട് ചെയ്യുകയായിരുന്നെന്നും ആ സീന്‍ എടുക്കാന്‍ കുറച്ച് കഷ്ടപ്പാടായിരുന്നെന്നും കമല്‍ പറഞ്ഞു. കാറ്റടിക്കുന്നതിനൊപ്പം കരിയിലകള്‍ കൂടെ അതിനിടയില്‍ പറക്കുന്നുണ്ടായിരുന്നെന്നും ആ ഷോട്ടില്‍ കരിയിലയൊക്കെ മുഖത്തടിച്ച് സംയുക്ത വീര്‍പ്പുമുട്ടിയിരിക്കുന്നത് കാണാന്‍ സാധിക്കുമെന്നും കമല്‍ കൂട്ടിച്ചേര്‍ത്തു.

അടുത്ത ഷോട്ടില്‍ കരിയിലകളോടൊപ്പം കുറെ മണ്ണും സംയുക്തയുടെ മുഖത്തേക്കടിച്ചിട്ട് അവര്‍ക്ക് ശ്വാസംമുട്ടലുണ്ടായെന്നും ബോധം കെട്ട് വീഴാന്‍ പോയെന്നും കമല്‍ പറഞ്ഞു. ആ സമയത്ത് ബിജു മേനോന് ഷോട്ട് ഇല്ലായിരുന്നെങ്കിലും അയാള്‍ ലൊക്കേഷനിലെത്തിയിരുന്നെന്നും കമല്‍ കൂട്ടിച്ചേര്‍ത്തു. സംയുക്ത ബോധം കെട്ട് വീഴുന്നത് കണ്ട് ബിജു ഓടിവന്ന് സംയുക്തയെ എഴുന്നേല്പിച്ച് ഇരുത്തിയെന്നും അവരോട് പോയി റെസ്റ്റ് എടുക്കാന്‍ പറഞ്ഞെന്നും കമല്‍ പറഞ്ഞു. റെഡ് എഫ്.എം. മലയാളത്തോട് സംസാരിക്കുകയായിരുന്നു കമല്‍.

‘ബിജു മേനോന്റെയും സംയുക്തയെയും വെച്ച് രണ്ട് സിനിമകള്‍ ഞാന്‍ ചെയ്തിട്ടുണ്ട്. മേഘമല്‍ഹാറും മധുരനൊമ്പരക്കാറ്റും. അതില്‍ മധുരനൊമ്പരക്കാറ്റിന്റെ സെറ്റില്‍ വെച്ചാണ് അവരുടെ പ്രണയം എല്ലാവരും അറിഞ്ഞത്. മധുരനൊമ്പരക്കാറ്റിന്റെ ക്ലൈമാക്‌സ് കണ്ടിട്ടുള്ളവര്‍ക്കറിയാം, മൊത്തം കാറ്റാണ് ആ സീനില്‍. ആ കാറ്റിന്റെ സമയത്ത് സംയുക്തയുടെ ക്യാരക്ടര്‍ സ്‌കൂളിലേക്ക് ഒടിവരുന്നുണ്ട്.

കാറ്റിന്റെ ഇടയില്‍ കരിയിലയൊക്കെ മുഖത്തേക്ക് അടിച്ച് സംയുക്ത വല്ലാതെ വീര്‍പ്പുമുട്ടുന്നുണ്ടായിരുന്നു. ഒരു ഷോട്ട് എടുക്കുന്നതിന്റെ ഇടയില്‍ ഇലകളുടെ കൂടെ മണ്ണും കൂടി പറന്ന് സംയുക്തയുടെ മുഖത്തേക്കടിച്ച് അവര്‍ക്ക് ശ്വാസം മുട്ടലുണ്ടായി. സെറ്റിലുണ്ടായിരുന്ന എല്ലാവരും പെട്ടെന്ന് പാനിക്കായി.

അന്ന് ബിജു മേനോനും ലൊക്കേഷനിലുണ്ടായിരുന്നു. അയാളുടെ സീനൊന്നും ഉണ്ടായിരുന്നില്ല. എന്നാലും ബിജു സെറ്റിലേക്ക് വരും. സംയുക്ത ശ്വാസം കിട്ടാതെ ഇരിക്കുന്നത് കണ്ട് ബിജു എവിടന്നോ ഓടിവന്ന് സംയുക്തയെ എഴുന്നേല്പിച്ച് ഇരുത്തി മുഖത്ത് വെള്ളമൊക്കെ തളിച്ച് അവരെ ഓക്കെയാക്കി.

അന്ന് അവരെക്കൊണ്ട് വേറെ ഷൂട്ട് ചെയ്യിച്ചില്ല. റൂമിലേക്ക് പോയി റെസ്റ്റ് എടുക്കാന്‍ പറഞ്ഞു. അന്നത്തെ ഷൂട്ട് കഴിഞ്ഞ് ഞാനും ഹോട്ടല്‍ റൂമിലേക്ക് പോയി. സംയുക്തക്ക് എങ്ങനെയുണ്ടെന്നറിയാന്‍ വേണ്ടി അവരുടെ റൂമിലേക്ക് പോയപ്പോള്‍ അവിടെ സംയുക്തയുടെയും അമ്മയുടെയും കൂടെ ബിജു മേനോനും. എന്നെ കണ്ടയുടനെ ‘ഞാന്‍ വെറുതെ സുഖവിവരം അന്വേഷിക്കാന്‍ വന്നതാ’ എന്ന് ബിജു പറഞ്ഞു. ഞാന്‍ അയാളോട് ഒന്നും ചോദിച്ചില്ലായിരുന്നു,’ കമല്‍ പറയുന്നു.

Content Highlight: Kamal shares the memories of romance between Biju Menon and Samyuktha Varma