ഐ.പി.എല്ലില്‍ ഇന്ന് രണ്ട് മത്സരങ്ങളാണ് നടക്കാനിരിക്കുന്നത്. ആദ്യ മത്സരത്തില്‍ ആരാധകരുടെ പ്രിയ ടീമായ ചെന്നൈ സൂപ്പര്‍ കിങ്സും ദല്‍ഹി ക്യാപിറ്റേഴ്സും ഏറ്റുമുട്ടും. ചെന്നൈയുടെ തട്ടകമായ എം.എ ചിദംബരം സ്റ്റേഡിയമാണ് മത്സര വേദി.

ഹാട്രിക് വിജയമാണ് യുവ നായകന്‍ അക്സര്‍ പട്ടേലിന്റെ നേതൃത്വത്തില്‍ ഇറങ്ങുന്ന ക്യാപിറ്റല്‍സ് ഉന്നം വെക്കുന്നത്. മുന്‍ ചാമ്പ്യന്‍മാര്‍ക്കെതിരെ വിജയം നേടി പോയിന്റ് ടേബിളില്‍ മുമ്പിലെത്തുകയാണ് ക്യാപിറ്റല്‍സിന്റെ ലക്ഷ്യം. നിലവില്‍ രണ്ട് മത്സരത്തില്‍ നിന്ന് രണ്ട് ജയവുമായി ദല്‍ഹി നാല് പോയിന്റ് നേടി രണ്ടാം സ്ഥാനത്താണ്.

അതേസമയം, ഐ.പി.എല്ലിലെ അഞ്ച് വട്ടം ചാമ്പ്യന്‍മാരായ ചെന്നൈ സൂപ്പര്‍ കിങ്സ് മോശം ഫോമിലാണ്. ആദ്യ മത്സരത്തില്‍ മുംബൈ ഇന്ത്യന്‍സിനോട് നേടിയ വിജയം മാത്രമാണ് ഈ സീസണില്‍ നേടാനായത്. റോയല്‍ ചലഞ്ചേഴ്സ് ബെംഗളുരുവിനോടും രാജസ്ഥാന്‍ റോയല്‍സിനോടും ചെന്നൈ പരാജയപ്പെട്ടിരുന്നു. തുടര്‍ച്ചയായ തോല്‍വിയില്‍ നിന്ന് കരകയറി വിജയ വഴിയില്‍ തിരിച്ചെത്താനാണ് ചെപ്പോക്കില്‍ സൂപ്പര്‍ കിങ്സ് ലക്ഷ്യമിടുന്നത്.

ദല്‍ഹിക്കെതിരായ മത്സരത്തില്‍ ചെന്നൈയെ നയിക്കാന്‍ എം.എസ്. ധോണി എത്തിയേക്കും. മത്സരത്തിന് മുന്നോടിയായുള്ള വാര്‍ത്താ സമ്മേളനത്തില്‍ ചെന്നൈയുടെ ബാറ്റിങ് പരിശീലകനായി മൈക്കല്‍ ഹസിയാണ് ഇതിന്റെ സൂചനകള്‍ നല്‍കിയത്.

മാര്‍ച്ച് 30ന് രാജസ്ഥാന്‍ റോയല്‍സുമായുള്ള മത്സരത്തില്‍ ക്യാപ്റ്റന്‍ ഋതുരാജ് ഗെയ്ക്വാദിന് പരിക്കേറ്റിരുന്നു. പരിക്ക് മാറിയില്ലെങ്കില്‍ ദല്‍ഹിക്കെതിരേ താരത്തിന് ഇറങ്ങാന്‍ സാധിച്ചേക്കില്ല. ഗെയ്ക്വാദിന് പ്ലെയിങ് ഇലവനില്‍ ഇടം പിടിക്കാനായില്ലെങ്കില്‍ ധോണിയായിരിക്കും നായകന്റെ ചുമതലയില്‍ എത്തുക.

വാര്‍ത്ത സമ്മേളനത്തില്‍ ഗെയ്ക്വാദിന്റെ പരിക്കിനെ കുറിച്ച് സംസാരിച്ച ഹസി ദല്‍ഹിക്കെതിരെ ആര് നയിക്കുമെന്ന് ഉറപ്പില്ലെന്നും പറഞ്ഞു. സ്റ്റമ്പിന് പിന്നില്‍ ഒരു ചെറുപ്പക്കാരനുണ്ടെന്നും ആ റോളില്‍ അവന് കുറച്ച് പരിചയമുണ്ടെന്നും അദ്ദേഹം കൂട്ടിച്ചേര്‍ത്തു.

‘റുതുരാജ് ഗെയ്ക്വാദ് എത്രത്തോളം സുഖം പ്രാപിച്ചു എന്നതിനെ ആശ്രയിച്ചായിരിക്കും ദല്‍ഹിക്കെതിരെ ഇറങ്ങുക. അവന് ഇപ്പോഴും വേദനയുണ്ട്. നെറ്റ്‌സില്‍ എങ്ങനെ ബാറ്റ് ചെയ്യുമെന്നതിന് അനുസരിച്ചാണ് അവന് കളിക്കുന്നത് തീരുമാനിക്കുക. അവനില്ലെങ്കില്‍ ആര് നയിക്കുമെന്ന് ഉറപ്പില്ല

അതിനെക്കുറിച്ച് ഞാന്‍ അധികം ചിന്തിച്ചിട്ടില്ല. (സ്റ്റീഫന്‍) ഫ്‌ലെമിംഗും റുട്ടുവും (ഗെയ്ക്വാദ്) അതിനെക്കുറിച്ച് ചിന്തിച്ചിട്ടുണ്ടാകുമെന്ന് എനിക്ക് ഉറപ്പുണ്ട്. ഒരു ചെറുപ്പക്കാരന്‍ മുന്നിലുണ്ട്. അയാള്‍ സ്റ്റമ്പിന് പിന്നിലുണ്ട്. ആ റോളില്‍ അദ്ദേഹത്തിന് കുറച്ച് പരിചയമുണ്ട്. അതിനാല്‍ ഒരുപക്ഷേ അദ്ദേഹത്തിന് അത് ചെയ്യാന്‍ കഴിഞ്ഞേക്കും. പക്ഷേ സത്യം പറഞ്ഞാല്‍ എനിക്ക് കൃത്യമായി ഉറപ്പില്ല,’ ഹസി പറഞ്ഞു.

Content Highlight: IPL 2025: CSK vs DC: Chennai Super Kings Coach Drops Major Hint On MS Dhoni Returning As Captain