ന്യൂദൽഹി: മാധ്യമ സ്വാതന്ത്ര്യത്തിന് വേണ്ടി പാർലമെൻ്റിൽ സംസാരിക്കണമെന്ന് പ്രതിപക്ഷ നേതാവ് രാഹുൽ ഗാന്ധിയോട് ആവശ്യപ്പെട്ട് എഡിറ്റേഴ്‌സ് ഗിൽഡ് ഓഫ് ഇന്ത്യ(ഇ.ജി.ഐ). മാധ്യമ സ്വാതന്ത്ര്യത്തിന് കടിഞ്ഞാണിടാൻ പ്രധാനമന്ത്രി നരേന്ദ്ര മോദി നിയമ നടപടികൾ സ്വീകരിക്കുന്നതിനിടെയാണ്  നീക്കം.

സർക്കാർ കൊണ്ട് വന്ന നിയമങ്ങൾ മാധ്യമങ്ങളുടെ സ്വാതന്ത്ര്യം ഇല്ലാതാക്കുകയാണെന്ന് എഡിറ്റേഴ്സ് ഗിൽഡ് രാഹുൽ ഗാന്ധിക്കെഴുതിയ കത്തിൽ പറയുന്നു.

‘മാധ്യമ സ്വാതന്ത്ര്യത്തിനു വേണ്ടിയുള്ള നിയമ നിർമാണത്തിൽ വേണ്ടത്ര കൂടിയാലോചനകൾ നടന്നിട്ടില്ല. നിയമങ്ങളുടെ കരട് തയ്യാറാക്കുന്നതിലും പാസാക്കുന്നതിലും വ്യക്തമായ അഭിപ്രായം തേടാതെയാണ് ഗവൺമെൻ്റ് നടപടിയെടുത്തത്,’ എഡിറ്റേഴ്സ് ഗിൽഡ് ഓഫ് ഇന്ത്യ പറഞ്ഞു.

ഡിജിറ്റൽ പേഴ്‌സണൽ ഡാറ്റ പ്രൊട്ടക്ഷൻ ആക്‌ട് (2023), ബ്രോഡ്‌കാസ്റ്റിങ് സർവീസസ് റെഗുലേഷൻ ബിൽ (2023), പ്രസ് ആൻഡ് രജിസ്‌ട്രേഷൻ ഓഫ് ആനുകാലിക നിയമം (2023), ഐ.ടി റൂൾസ് 2021 എന്നിവ ഉൾപ്പെടെയുള്ള നിയമനിർമാണ നടപടികളെക്കുറിച്ച് കത്തിൽ ചൂണ്ടിക്കാട്ടി.

ഇന്ത്യയിൽ മാധ്യമങ്ങൾ നേരിട്ട് കൊണ്ടിരിക്കുന്ന ഈ പ്രശ്നങ്ങൾ പാർലമെൻ്റിൽ ഉന്നയിക്കണമെന്നും ആവശ്യമായ ഭേദഗതികൾക്ക് വേണ്ടി പ്രവർത്തിക്കണമെന്നും എഡിറ്റേഴ്സ് ഗിൽഡ് ഓഫ് ഇന്ത്യ രാഹുൽ ഗാന്ധിയോട് ആവശ്യപ്പെട്ടു.

‘ഒരു ജനാധിപത്യ രാജ്യത്ത് സ്വതന്ത്രമായ മാധ്യമപ്രവർത്തനം സുപ്രധാനമാണെന്ന് ഞങ്ങൾ വിശ്വസിക്കുന്നു.

എന്നാൽ ഇന്നത്തെ അവസ്ഥയിൽ മാധ്യമ സ്വാതന്ത്ര്യവും വിവരാവകാശവും സംരക്ഷിക്കുന്നതിന് നിയമനിർമ്മാണ നടപടികൾ പുനഃപരിശോധിക്കേണ്ടത് അത്യന്താപേക്ഷിതമാണ്,’ എഡിറ്റേഴ്സ് ഗിൽഡ് ഓഫ് ഇന്ത്യ പറഞ്ഞു.

നിയമാനുസൃതമായ പത്രപ്രവർത്തനം നിയമങ്ങളിലൂടെ നിയന്ത്രിക്കാനുള്ള ശ്രമങ്ങളാണ് നടന്നുകൊണ്ടിരിക്കുന്നത്. ഇതിനായി സർക്കാർ സംവിധാനങ്ങൾ ഉപയോഗിക്കുകയാണെന്നും കത്തിൽ ചൂണ്ടിക്കാട്ടി.

Content Highlight: Editors Guild of India writes to Rahul Gandhi