തിരുവനന്തപുരം: മാണി സി. കാപ്പന്റെ ജയത്തോടെ കിഫ്ബി അടക്കമുള്ള അഭിമാനപദ്ധതികള്‍ക്കെതിരെ മെനഞ്ഞ ദുരാരോപണങ്ങള്‍ ജനം മുഖവിലയ്‌ക്കെടുത്തിട്ടില്ല എന്ന് വ്യക്തമായിരിക്കുകയാണെന്ന് ധനമന്ത്രി ടി.എം തോമസ് ഐസക്ക്. തെരഞ്ഞെടുപ്പു ചര്‍ച്ചയില്‍ നിന്ന് പാലാരിവട്ടം അഴിമതി മറയ്ക്കാന്‍ യു.ഡി.എഫിന്റെ ബുദ്ധിശാലകള്‍ തട്ടിക്കൂട്ടിയ ഈ ആരോപണങ്ങളെല്ലാം ജനങ്ങള്‍ തള്ളിക്കളഞ്ഞിരിക്കുകയാണെന്നും മന്ത്രി തോമസ് ഐസക്ക് പറഞ്ഞു.
ആരോപണങ്ങള്‍ അസംബന്ധമാണെന്ന എല്‍.ഡി.എഫിന്റെ വിശദീകരണമാണ് ജനങ്ങള്‍ സ്വീകരിച്ചത്. വികസന പ്രവര്‍ത്തനങ്ങള്‍ ഊര്‍ജസ്വലമായി മുന്നോട്ടുകൊണ്ടുപോകാന്‍ സംസ്ഥാന സര്‍ക്കാരിന് ജനങ്ങള്‍ നല്‍കിയ ലൈസന്‍സാണ് പാലായിലെ അഭിമാനകരമായ വിജയം.
പാലയിലെ എല്‍.ഡി.എഫ് വിജയം ഒരുകാര്യം അസന്നിഗ്ധമായി ഉറപ്പിക്കുന്നു. ലോകസഭാ തിരഞ്ഞെടുപ്പില്‍ കണ്ടതല്ല, കേരളത്തിലെ രാഷ്ട്രീയബലാബലം. അതൊരു പ്രത്യേക സാഹചര്യത്തിന്റെ സൃഷ്ടിയാണ്. ആ അന്തരീക്ഷം പൂര്‍ണമായും മാറിയിരിക്കുന്നു. അതാണ് പാലാ തിരഞ്ഞെടുപ്പു ഫലത്തിന്റെ രാഷ്ട്രീയ പ്രസക്തിയെന്നും തോമസ് ഐസക്ക് പറഞ്ഞു.
പാലായിലെ യു.ഡി.എഫ് കുത്തക അവസാനിപ്പിച്ച മാണി സി കാപ്പനും പാലയിലെ ജനങ്ങള്‍ക്കും അഭിവാദ്യങ്ങളര്‍പ്പിക്കുന്നതായും തോമസ് ഐസക്ക് പറഞ്ഞു.
