ബിഗ് ബോസിന്റെ ആദ്യ ഒ.ടി.ടി സീസണ്‍ കഴിഞ്ഞതോടുകൂടി പരിപാടിയിലെ വിജയിയായ ദിവ്യ അഗര്‍വാളിന്റെ വാക്കുകളാണ് ബോളിവുഡില്‍ ചര്‍ച്ചാ വിഷയമാവുന്നത്.
തനിക്ക് തന്റെ കഴിവ് തെളിയിക്കാന്‍ കരണ്‍ ജോഹറിന്റെ സിനിമ ആവശ്യമില്ല എന്നാണ് ദിവ്യ പറയുന്നത്. പരിപാടിയുടെ അവതാരകന്‍ കൂടിയായ കരണ്‍ ജോഹറുമായി നിരവധി തവണ ദിവ്യ കൊമ്പുകോര്‍ത്തിട്ടുണ്ട്.
ടാബ്ലോയ്ഡുമായി നടത്തിയ അഭിമുഖത്തിലാണ് ദിവ്യ ഇക്കാര്യം തുറന്നടിച്ചത്. കരണ്‍ ജോഹറിന്റെ ബാഡ് ബുക്കില്‍ പേരു വന്നത് ഭാവിയില്‍ സിനിമാ ജീവിതത്തെ ബാധിക്കുമോ എന്ന ചോദ്യത്തിനുള്ള മറുപടിയായാണ് താരം ഇക്കാര്യം പറഞ്ഞത്.
‘ഒരു നടിയെന്ന നിലയില്‍ എനിക്കെന്റെ കഴിവുകളില്‍ വിശ്വാസമുണ്ട്. ഞാന്‍ ഒരിക്കലും പട്ടിണി കിടന്ന് മരിക്കില്ല എന്ന വിശ്വാസവും എനിക്കുണ്ട്. അതിനെല്ലാമുപരി എനിക്ക് എന്റെ കഴിവുകള്‍ പ്രദര്‍ശിപ്പിക്കാന്‍ കരണ്‍ ജോഹറിന്റെ സിനിമ വേണമെന്ന് ഒരു നിര്‍ബന്ധവുമില്ല,’ ദിവ്യ പറയുന്നു.
‘സിനിമ വിജയിക്കുകയോ പരാജയപ്പെടുകയോ ചെയ്താലും സിനിമയെന്ന എന്റെ പാഷനെ ആളുകള്‍ എങ്ങനെ കാണുന്നു എന്നതിനെ കുറിച്ച് ഞാനിപ്പോള്‍ ചിന്തിക്കുന്നില്ല. എനിക്ക് ഇഷ്ടമുള്ള കാര്യങ്ങളാണ് ഞാനിപ്പോള്‍ ചെയ്യുന്നത്.
ചില മത്സരാര്‍ത്ഥികളുമായുള്ള കരണിന്റെ യാത്ര ഏതാനും വര്‍ഷങ്ങള്‍ക്കുമുമ്പ് ആരംഭിച്ചതാണ് എന്നാല്‍ ഇപ്പോഴാണ് എന്റെ യാത്ര ആരംഭിക്കുന്നത്,’ ദിവ്യ കൂട്ടിച്ചേര്‍ത്തു.
ഒക്ടോബര്‍ 2ന് ആണ് ബിഗ് ബോസ് സീസണ്‍ 15 ആരംഭിക്കുന്നത്. ബോളിവുഡ് താരം സല്‍മാന്‍ ഖാനാണ് പരിപാടിയുടെ അവതാരകന്‍. സല്‍മാന്റെ പ്രതിഫലത്തെ കുറിച്ചുള്ള വാര്‍ത്തകള്‍ കാരണം സീസണ്‍ 15 നേരത്തെ തന്നെ ചര്‍ച്ചകളില്‍ ഇടം പിടിച്ചിരുന്നു.
