ന്യൂദല്‍ഹി: തെരുവുകളില്‍ നടക്കുന്ന കുറ്റകൃത്യങ്ങളുടെ എണ്ണത്തില്‍ ലോക്ഡൗണ്‍ കാലയളവില്‍ ഗണ്യമായ കുറവുവന്നതായി റിപ്പോര്‍ട്ടുകള്‍. ദല്‍ഹി പൊലീസ് പുറത്തുവിട്ട കണക്കുകള്‍പ്രകാരം 56 ശതമാനം കുറവാണ് തെരുവില്‍ നടക്കുന്ന കുറ്റകൃത്യങ്ങളില്‍ രേഖപ്പെടുത്തിയിരിക്കുന്നത്.
ദല്‍ഹി പൊലീസ് വെബ്സൈറ്റില്‍ പ്രസിദ്ധീകരിച്ച കണക്കുകള്‍ പ്രകാരം കവര്‍ച്ച, പിടിച്ചുപറി, പരിക്കേല്‍പ്പിക്കല്‍ മോട്ടോര്‍ വാഹന മോഷണം എന്നീ കേസുകള്‍ ഈ വര്‍ഷം മെയ് വരെ ഗണ്യമായികുറഞ്ഞതായി പറയുന്നുണ്ട്.
കഴിഞ്ഞവര്‍ഷത്തെ കണക്കുകള്‍ പരിശോധിക്കുകയാണെങ്കില്‍ മേയ് മാസം ആകുമ്പോഴേയ്ക്കും ആയിരത്തിനടുത്ത് കവര്‍ച്ചാ കേസുകളാണ് റിപ്പോര്‍ട്ട് ചെയ്തത്. 964 ന് മുകളില്‍ കേസുകള്‍ റിപ്പോര്‍ട്ട് ചെയ്തതായാണ് പൊലീസിന്റെ കണക്കുകള്‍ പറയുന്നത്. എന്നാല്‍ ഈ വര്‍ഷം അത് 596 ആയി കുറഞ്ഞതായി പൊലീസ് വ്യക്തമാക്കി.
കഴിഞ്ഞ വര്‍ഷം 2,811 പിടിച്ചുപറി കേസുകളാണ് റിപ്പോര്‍ട്ട് ചെയ്തതെങ്കില്‍ ഈ വര്‍ഷം അത് 2,141 ആയി കുറഞ്ഞു.
