'അമല ആരാണ് സായിയെ വിമര്‍ശിക്കാന്‍'; അമലാ പോളിനെതിരെ സൈബര്‍ ആക്രമണം
തെലുങ്ക് നടന്റെ അഭിനയത്തെ കുറിച്ച് അഭിപ്രായം പറഞ്ഞതിന് നടി അമലാ പോളിന് നേരെ സൈബര്‍ ആക്രമണം. രാക്ഷസന്‍ എന്ന തമിഴ് ചിത്രത്തിന്റെ തെലുങ്ക് പതിപ്പില്‍ അഭിനയിച്ച സായി ശ്രീനിവാസിന്റെ അഭിനയം പോരെന്നാണ് അമല പോള്‍ അഭിപ്രായപ്പെട്ടത്.
തമിഴില്‍ വിഷ്ണു വിശാല്‍ അഭിനയിച്ച കഥാപാത്രത്തെ അത്രയും നന്നാക്കാന്‍ സായി ശ്രീനിവാസനായില്ല എന്ന വിമര്‍ശനമാണ് അമല പോള്‍ ഉന്നയിച്ചത്. തുടര്‍ന്നാണ് അമലാ പോളിന് നേരെ സൈബര്‍ ആക്രമണമുണ്ടായത്.
അമല സായി ശ്രീനിവാസിനെ അപമാനിച്ചുവെന്നാണ് ആരാധകര്‍ പറയുന്നത്. അമല ആരാണ് സായിയെ വിമര്‍ശിക്കാനെന്നും അതിനെന്തു യോഗ്യതയാണ് താരത്തിനുള്ളതെന്നും ആരാധകര്‍ ചോദിക്കുന്നു.
രാക്ഷസന്റെ റിമേക്കായ രാക്ഷസുടു എന്ന ഈ തെലുങ്ക് ചിത്രത്തില്‍ അനുപമ പരമേശ്വരനാണ് നായിക. തമിഴില്‍ വിഷ്ണു വിശാലും അമല പോളും കേന്ദ്ര കഥാപാത്രങ്ങളായി എത്തിയ രാക്ഷസന്‍ വലിയ വിജയമാണ് നേടിയത്. കേരളത്തിലും ചിത്രം സൂപ്പര്‍ഹിറ്റായിരുന്നു.
അതേസമയം, തമിഴ് സൂപ്പര്‍ സ്റ്റാര്‍ വിജയ് സൂപ്പര്‍ നടനല്ലെന്ന വിമര്‍ശനം നടന്‍ സിദ്ദിഖും ഉന്നയിച്ചിരുന്നു. നമ്മുടെ സൂപ്പര്‍ താരങ്ങള്‍ സൂപ്പര്‍ നടന്മാരാണെന്നതാണ് മലയാള സിനിമയുടെ സൗഭാഗ്യമെന്നും മറ്റു ഭാഷകളില്‍ അത്തരം മഹിമകളില്ലെന്നും സിദ്ദിഖ് പറഞ്ഞിരുന്നു. എന്നാല്‍, കമല്‍ഹാസന്‍ സൂപ്പര്‍നടനും സൂപ്പര്‍സ്റ്റാറുമാണെന്നും സിദ്ദിഖ് പറഞ്ഞിരുന്നു.
സിദ്ദിഖിനെ വിമര്‍ശിച്ച് നടന്‍ ഹരീഷ് പേരടി രംഗത്തെത്തിയിരുന്നു. വിജയ് സൂപ്പര്‍ നടനും സൂപ്പര്‍ താരവുമാണെന്നും സഹജീവികളോട് കരുണയുള്ള ജീവിക്കുന്ന കാലത്തോട് കൃത്യമായ നിലപാടുള്ള സൂപ്പര്‍ മനുഷ്യനുമാണെന്നും ഹരീഷ് പേരടി പറഞ്ഞിരുന്നു.
