തിരുവനന്തപുരം: ഇടുക്കി മുന്‍ എം. പി ജോയ്സ് ജോര്‍ജിനെ തള്ളി സി.പി.ഐ.എം. രാഹുല്‍ ഗാന്ധിക്കെതിരായ പരാമര്‍ശത്തോട് സി.പി.ഐ.എം യോജിക്കുന്നില്ല. രാഹുല്‍ ഗാന്ധിയുടേയും കോണ്‍ഗ്രസിന്റെയും രാഷ്ട്രീയ നിലപാടുകളെയാണ് എതിര്‍ക്കുന്നതെന്നും സി.പി.ഐ.എം സംസ്ഥാന സെക്രട്ടറിയേറ്റ് പുറത്ത് വിട്ട പ്രസ്താവനയില്‍ പറയുന്നു.
‘ഇടുക്കി മുന്‍ എം.പി ജോയ്സ് ജോര്‍ജ്, രാഹുല്‍ ഗാന്ധിയ്ക്കെതിരെ നടത്തിയ ചില പരാമര്‍ശങ്ങളോട് സി.പി.ഐ.എം യോജിക്കുന്നില്ല. രാഹുല്‍ഗാന്ധിയുടേയും കോണ്‍ഗ്രസിന്റേയും രാഷ്ട്രീയ നിലപാടുകളെയാണ് സി.പി.ഐ.എം എതിര്‍ക്കുന്നത്. അത്തരം രാഷ്ട്രീയ വിമര്‍ശനങ്ങളില്‍ നിന്ന് ശ്രദ്ധ തിരിച്ചുവിടാന്‍ മാത്രമേ വ്യക്തിപരമായ ഇത്തരം പരാമര്‍ശങ്ങള്‍ സഹായിക്കുകയുള്ളു. ഇത്തരത്തിലുള്ള പരാമര്‍ശങ്ങള്‍ ആരുടെ ഭാഗത്തു നിന്നും ഉണ്ടാകാന്‍ പാടില്ല,’ പ്രസ്താവനയില്‍ പറയുന്നു.
ജോയ്സ് ജോര്‍ജിന്റെ പ്രസ്താവനയെ തള്ളി മുഖ്യമന്ത്രി പിണറായി വിജയനും രംഗത്തെത്തിയിരുന്നു.
എല്‍.ഡി.എഫ് സ്ഥാനാര്‍ത്ഥിയും മന്ത്രിയുമായ എം. എം മണിയുടെ തെരഞ്ഞെടുപ്പ് പ്രചരണ യോഗത്തിലായിരുന്നു രാഹുല്‍ ഗാന്ധിയെ ജോയ്സ് ജോര്‍ജ് ആക്ഷേപിച്ചത്.
രാഹുല്‍ കോളേജ് വിദ്യാര്‍ത്ഥികളുമായി സംവദിച്ചിരുന്നു. ഇതുമായി ബന്ധപ്പെട്ടാണ് ജോയ്സ് ജോര്‍ജ് സ്ത്രീവിരുദ്ധപരവും രാഹുല്‍ ഗാന്ധിക്കെതിരെ അധിക്ഷേപപരവുമായ പരാമര്‍ശം നടത്തിയത്.
‘രാഹുല്‍ഗാന്ധി പെണ്‍കുട്ടികള്‍ മാത്രം പഠിക്കുന്ന കോളേജിലേ പോകൂ. അവിടെ ചെന്ന് പെണ്‍കുട്ടികളെ വളഞ്ഞ് നില്‍ക്കാനും നിവര്‍ന്ന് നില്‍ക്കാനുമൊക്കെ പഠിപ്പിക്കും. എന്റെ പൊന്നുമക്കളെ രാഹുല്‍ ഗാന്ധി പറയുമ്പോള്‍ വളഞ്ഞ് നില്‍ക്കാനും നിവര്‍ന്ന് നില്‍ക്കാനുമൊന്നും പോയേക്കരുത്. അദ്ദേഹം പെണ്ണൊന്നും കെട്ടിയിട്ടില്ല,’ എന്നായിരുന്നു ജോയ്ജ് ജോര്‍ജിന്റെ പരാമര്‍ശം.
എം. എം മണിയുടെ തെരഞ്ഞെടുപ്പ് പ്രചാരണാര്‍ത്ഥം ഇരട്ടയാറില്‍ സംഘടിപ്പിച്ച യോഗത്തിലായിരുന്നു ജോയ്സ് ജോര്‍ജിന്റെ വിവാദ പരാമര്‍ശം.
തമിഴ്‌നാട്, കേരളം തുടങ്ങിയ സംസ്ഥാനങ്ങളിലെ നിയമസഭാ തെരഞ്ഞെടുപ്പ് പ്രമാണിച്ച് രാഹുല്‍ ഗാന്ധി കോളേജ് വിദ്യാര്‍ത്ഥികളുമായും സ്‌കൂള്‍ വിദ്യാര്‍ത്ഥികളുമായും സംവദിച്ചിരുന്നു.
തമിഴ്‌നാട് മുളഗുമൂട് സ്‌കൂളിലെ വിദ്യാര്‍ത്ഥിനിക്കൊപ്പം പുഷ് അപ്പ് എടുക്കുകയും മറ്റൊരു വിദ്യാര്‍ത്ഥിക്ക് ‘ഐക്കഡോ’ എന്ന കായികാഭ്യാസത്തിന്റെ ചില ചുവടുകള്‍ കാണിച്ചു കൊടുക്കുകയും ചെയ്തിരുന്നു.
അടുത്തിടെ കേരളത്തില്‍ പര്യടനത്തിന് വന്നഘട്ടത്തിലും കോളേജ് വിദ്യാര്‍ത്ഥിനികളുമായി സംവദിച്ചിരുന്നു. ഈ പശ്ചാത്തലത്തിലാണ് ജോയ്ജ് ജോര്‍ജിന്റെ പരാമര്‍ശം.
ഡൂള്‍ന്യൂസിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
