അബുദാബി: കൊവിഡും ലോക്ക്ഡൗണും സൃഷ്ടിച്ച സാമ്പത്തിക പ്രതിസന്ധിക്കിടെ അപ്രതീക്ഷിതമായി കോടിപതിയായതിന്റെ ഞെട്ടലിലാണ് അബുദാബിയില്‍ കഴിയുന്ന പഞ്ചാബ് സ്വദേശിയായ ഗുര്‍പ്രീത് സിംഗ്‌. അബുദാബി ബിഗ് ടിക്കറ്റ് സീരിസിന്റെ നറുക്കെടുപ്പിലാണ് ഗുര്‍പ്രീത് സിംഗിന് ലോട്ടറിയടിച്ചത്. ബിഗ് സീരിസിന്റെ 219-ാമത് നറുക്കെടുപ്പില്‍ ഒന്നാം സമ്മാനം നേടിയത് ഗുര്‍പ്രീതിന്റെ 067757 എന്ന ടിക്കറ്റായിരുന്നു. 20 കോടിയിലേറെ രൂപയാണ് (10 ദശലക്ഷം ദിര്‍ഹം) സമ്മാനത്തുക.
ഗുര്‍പ്രീത് സിംഗ്‌
ഷാര്‍ജയില്‍ ഐ.ടി മാനേജരായി ജോലി ചെയ്യുന്ന ഗുര്‍പ്രീത് 34 വര്‍ഷമായി യു.എ.ഇയില്‍ താമസക്കാരനാണ്. കഴിഞ്ഞ രണ്ടുമാസമായി ഇദ്ദേഹം മുടങ്ങാതെ ടിക്കറ്റ് എടുക്കുമായിരുന്നു. ചിലപ്പോഴെല്ലാം സുഹൃത്തുക്കളോടൊപ്പമാണ് ടിക്കറ്റ് എടുക്കാറുണ്ടായിരുന്നതെന്നും എന്നാല്‍ ഈ ടിക്കറ്റ് താന്‍ തനിയെ എടുത്തതാണെന്നും ഗുര്‍പ്രീത് പറഞ്ഞു.
സമ്മാനം കരസ്ഥമാക്കിയ വിവരം അറിയിക്കാന്‍ അധികൃതര്‍ വിളിച്ചപ്പോള്‍ ആരെങ്കിലും പറ്റിക്കുകയായിരിക്കുമെന്നാണ് താന്‍ കരുതിയതെന്ന് ഗുര്‍പ്രീത് പറയുന്നു. ‘ബിഗ് ടിക്കറ്റ് അധികൃതര്‍ വിളിച്ചപ്പോള്‍ ആരോ കബളിപ്പിക്കാന്‍ വിളിക്കുകയാണെന്നായിരുന്നു കരുതിയത്. പിന്നീടാണ് സത്യമാണെന്ന് മനസ്സിലായത്. കൊവിഡിന്റെ ഈ ദുരിതകാലത്ത് ഈ സമ്മാനം ലഭിച്ചതില്‍ വലിയ സന്തോഷം തോന്നി.’
