തൃശ്ശുര്‍: ഷാജിപാപ്പനും, ഷമീറും, ഡ്യൂഡും, സാത്താന്‍ സേവ്യറും, ക്യാപ്റ്റന്‍ ക്ലീറ്റസും കേരളത്തില്‍ ഉണ്ടാക്കിയ ഓളം ചെറുതല്ല. ആട് 2 ന്റെ വന്‍ വിജയവും അതാണ് കാണിച്ചുതരുന്നത്.
ചിത്രത്തിന്റെ മൂന്നാം ഭാഗവും പ്രഖ്യാപിച്ചിരുന്നെങ്കിലും പിന്നീട് ഒരു വിവരവും പ്രേക്ഷകര്‍ക്ക് ലഭിച്ചിരുന്നില്ല. ഇപ്പോഴിതാ ആട് 3 ഷൂട്ടിംഗും റിലീസും പ്രഖ്യാപിച്ചിരിക്കുകയാണ് നിര്‍മ്മാതാവ് വിജയ് ബാബുവും ജയസുര്യയും സംവിധായകന്‍ മിഥുന്‍ മാനുവല്‍ തോമസും.
അതും ആട് ബിരിയാണി വെച്ചുകൊണ്ടാണ് ചിത്രത്തിന്റെ ഷൂട്ടിംഗ് പ്രഖ്യാപിച്ചത്. അടുത്ത ഏപ്രില്‍ മെയ് മാസത്തില്‍ ചിത്രത്തിന്റെ ഷൂട്ടിംഗ് ആരംഭിക്കും. ചിത്രം ഓണത്തിന് തിയേറ്ററുകളില്‍ എത്തും.
ഫ്രൈഡെ ഫിലിംസിന്റെ തന്നെ ചിത്രമായ തൃശ്ശൂര്‍ പൂരത്തിന്റെ ചിത്രീകരണം അവസാനിക്കുന്ന ദിവസമാണ് പുതിയ ചിത്രത്തിന്റെ ഷൂട്ടിംഗ് തിയ്യതി പ്രഖ്യാപിച്ചത്. നേരത്തെ ആട് 2 ന്റെ വിജയാഘോഷവേളയില്‍ ആയിരുന്നു ആട് 3 പ്രഖ്യാപിച്ചത്.
മുഴുനീള കോമഡി ചിത്രമായിരുന്ന ”ആട് ഒരു ഭീകരജീവിയാണ്” 2015 ഫെബ്രുവരി ആറിനാണ് ആദ്യം തിയേറ്ററുകളിലെത്തിയത്. വിജയ് ബാബുവും സാന്ദ്ര തോമസും ചേര്‍ന്ന് നിര്‍മ്മിച്ച ചിത്രം പക്ഷേ തിയേറ്ററുകളില്‍ പരാജയപ്പെട്ടു.
എന്നാല്‍ ഡി.വി.ഡി റിലീസ് ചെയ്തതോടെയാണ് ചിത്രവും ജയസൂര്യയുടെ ഷാജി പാപ്പാനും സൂപ്പര്‍ ഹിറ്റായി മാറി. ട്രോളുകളിലൂടെയും മറ്റും സമൂഹമാധ്യമങ്ങളില്‍ ചിത്രം സജീവമായി നിറഞ്ഞു നിന്നു. ആരാധകരുടെ തുടര്‍ച്ചയായ ആവശ്യത്തെ തുടര്‍ന്ന് ഒരുക്കിയ ചിത്രത്തിന്റെ രണ്ടാം ഭാഗമായ ”ആട് 2” കഴിഞ്ഞ വര്‍ഷം ഡിസംബര്‍ 22-ന് തിയേറ്ററുകളിലെത്തിയിരുന്നു. ചിത്രത്തിന് റെക്കോര്‍ഡ് വിജയം നല്‍കിയാണ് ഷാജി പാപ്പന്റെ രണ്ടാം വരവ് ആരാധകര്‍ ആഘോഷമാക്കിയത്.
ജയസൂര്യ, ധര്‍മ്മജന്‍ ബോള്‍ഗാട്ടി, സൈജു കുറുപ്പ്, സണ്ണി വെയിന്‍, വിനയകന്‍, വിജയ് ബാബു, സാന്ദ്ര തോമസ്, വിനീത് മോഹന്‍, ഉണ്ണി രാജന്‍ പി. ദേവ്, ഹരികൃഷ്ണന്‍, ഭഗത് മാനുവേല്‍, ഇന്ദ്രന്‍സ്, ചെമ്പന്‍ വിനോദ്, രഞ്ജി പണിക്കര്‍, സുധി കോപ്പ തുടങ്ങിയവരാണ് ചിത്രത്തിലെ പ്രധാന വേഷങ്ങള്‍ കൈകാര്യം ചെയ്തത്.
സംഗീതസംവിധായകന്‍ രതീഷ് വേഗ കഥയും തിരക്കഥയും രചിക്കുന്ന ചിത്രമാണ് തൃശ്ശൂര്‍ പൂരം. നവാഗതനായ രാജേഷ് മോഹനനാണ് ചിത്രം സംവിധാനം ചെയ്യുന്നത്. ചിത്രത്തില്‍ സാബു മോനും ഒരു പ്രധാന വേഷത്തില്‍ എത്തുന്നുണ്ട്
DoolNews Video
