വനിതാ പ്രീമിയര്‍ ലീഗില്‍ റോയല്‍ ചലഞ്ചേഴ്‌സ് ബെംഗളൂരുവിനെതിരെ മികച്ച സ്‌കോര്‍ പടുത്തുയര്‍ത്തി ഗുജറാത്ത് ജയന്റ്‌സ്. ദല്‍ഹി അരുണ്‍ ജെയ്റ്റ്‌ലി സ്റ്റേഡിയത്തില്‍ നടന്ന മത്സരത്തിലാണ് ജയന്റ്‌സ് തകര്‍ത്തടിച്ചത്.
സീസണില്‍ കളിച്ച് നാലില്‍ നാല് മത്സരവും പരാജയപ്പെട്ട ജയന്റ്‌സ് ആദ്യ ജയത്തിനായാണ് പൊരുതുന്നത്. മത്സരത്തില്‍ ടോസ് നേടി ബാറ്റിങ് തെരഞ്ഞെടുത്ത ക്യാപ്റ്റന്‍ ബെത് മൂണി ലോറ വോള്‍വാര്‍ഡിനൊപ്പം ചേര്‍ന്ന് തന്റെ തീരുമാനം ശരിവെക്കുന്ന പ്രകടനം പുറത്തെടുത്തു.
നേരിട്ട ആദ്യ ഓവറില്‍ തന്നെ ഇരുവരും നയം വ്യക്തമാക്കിയതോടെ ജയന്റ്‌സ് സ്‌കോര്‍ ബോര്‍ഡ് അതിവേഗം ചലിച്ചു. ഒന്നിന് പിന്നാലെ ഒന്ന് എന്ന നിലയില്‍ ബൗണ്ടറികള്‍ പാഞ്ഞതോടെ റോയല്‍ ചലഞ്ചേഴ്‌സിന്റെ പദ്ധികള്‍ മുഴുവന്‍ തെറ്റി.
പിന്നാലെയെത്തിയവരില്‍ ഫോബ് ലീച്ച് ഫീല്‍ഡിന് മാത്രമാണ് സ്‌കോര്‍ ബോര്‍ഡിലേക്ക് എന്തെങ്കിലും സംഭാവന ചെയ്യാന്‍ സാധിച്ചത്. 17 പന്തില്‍ 18 റണ്‍സാണ് താരം നേടിയത്.
ഈ മികച്ച പ്രകടനത്തിന് പിന്നാലെ പല റെക്കോഡുകളും ലോറയെയും മൂണിയെയും തേടിയെത്തിയിരുന്നു. വനിതാ പ്രീമിയര്‍ ലീഗില്‍ ഓപ്പണര്‍മാര്‍ ചേര്‍ന്ന് സ്വന്തമാക്കുന്ന ഏറ്റവും വലിയ സ്‌കോര്‍ (ഓപ്പണര്‍മാരുടെ ടോട്ടല്‍ സ്‌കോര്‍) എന്ന നേട്ടമാണ് ഇരുവരും നേടിയത്. 161 റണ്‍സാണ് ഇരുവരും ചേര്‍ന്ന് ടോട്ടലിലേക്ക് സംഭാവന ചെയ്തത്.
