രാഷ്ട്രീയ വിഭാഗീയത പണ്ടും പാര്‍ട്ടിയിലുണ്ടായിരുന്നു, എന്നാല്‍ ഇപ്പോഴത് സമ്പത്തിനെ ചൊല്ലി: എം.എം ലോറന്‍സ്
ഡൂള്‍ന്യൂസ് ഡെസ്‌ക്
Sunday, 28th June 2020, 8:53 am
കൊച്ചി: അനധികൃത സ്വത്ത് സമ്പാദന കേസില്‍ സി.പി.ഐ.എം സസ്‌പെന്‍ഡ് ചെയ്ത കളമശ്ശേരി ഏരിയ സെക്രട്ടറി സക്കീര്‍ ഹുസൈനെതിരെ മുതിര്‍ന്ന നേതാവ് എം.എം ലോറന്‍സ്. സക്കീര്‍ ഹുസൈനെതിരെ പാര്‍ട്ടി നടപടി പോര. പരാതി അന്വേഷിച്ച എളമരം കരീമിന്റെ അന്വേഷണ റിപ്പോര്‍ട്ട് സക്കീറിനെ രക്ഷിക്കാന്‍ ഉദ്ദേശിച്ചുള്ളതാണെന്നും ലോറന്‍സ് പറഞ്ഞു. മാതൃഭൂമി ന്യൂസിനോടായിരുന്നു അദ്ദേഹത്തിന്റെ പ്രതികരണം.
‘സക്കീര്‍ തിരുത്തില്ലെന്ന് ഉറപ്പുള്ള ആളാണ്. അങ്ങനെയുള്ള ഒരാള്‍ക്കെതിരെ സസ്‌പെന്‍ഷന്‍ നടപടിയല്ല വേണ്ടത്. കൂടുതല്‍ നടപടി സ്വീകരിക്കേണ്ടതായിരുന്നു’, എം.എം ലോറന്‍സ് വിമര്‍ശിച്ചു.
പരാതിയില്‍ അന്വേഷണം നടത്തിയ എളമരം കരീമിന്റെ റിപ്പോര്‍ട്ട് സക്കീര്‍ ഹുസൈനെ രക്ഷിക്കാന്‍ ഉദ്ദേശിച്ചിട്ടുള്ളതാണ്. സക്കീറിന് തുണയായത് പാര്‍ട്ടിയിലെ സാമ്പത്തിക കൂട്ടുകെട്ടാണെന്നും ലോറന്‍സ് ആരോപിച്ചു.
