പ്രതീക്ഷകളും റിപ്പോര്‍ട്ടുകളുമെല്ലാം ശരിവെച്ചിരിക്കുകയാണ് ബേസില്‍ ജോസഫിന്റെ മിന്നല്‍ മുരളി. അടുത്ത കാലത്തായി ഒരു പടം കണ്ട് ഇങ്ങനെ ഗൂസ്ബംപ്‌സ് മൊമന്റ്‌സ് ഉണ്ടായിട്ടില്ല. ഞങ്ങള്‍ക്കുമുണ്ടടാ സൂപ്പര്‍ഹീറോ എന്ന് പടം കാണുന്ന സമയത്ത് പലതവണ പറയാന്‍ തോന്നി. സത്യത്തില്‍ ടൊവിനോയല്ല, തിരക്കഥയും സംവിധാനവുമാണ് മിന്നല്‍ മുരളി എന്ന സിനിമയിലെ യഥാര്‍ത്ഥ സൂപ്പര്‍ ഹീറോസ്.

വലിയ ഹൈപ്പില്‍ വരുന്ന പടങ്ങള്‍ക്ക് പ്രേക്ഷകരുടെ പ്രതീക്ഷക്കൊപ്പം നില്‍ക്കുക എന്നത് അത്ര എളുപ്പമാകാറില്ല. എന്നാല്‍ മിന്നല്‍ മുരളി അക്കാര്യത്തില്‍ ഒരു വന്‍വിജയമാണ്. അണിയറ പ്രവര്‍ത്തകര്‍ എന്താണോ അവകാശപ്പെട്ടത് അതിനപ്പുറമെത്തുന്ന അനുഭവമാണ് സിനിമ ആദ്യ കാഴ്ചയില്‍ തരുന്നത്.

സിനിമയുടെ മാറിവരുന്ന വികാരങ്ങളുടെ ഗ്രാഫിനൊപ്പം പ്രേക്ഷകരെ കൊണ്ടുപോകാന്‍ മിന്നല്‍ മുരളിക്കാകുന്നുണ്ട്. കഥാസന്ദര്‍ഭങ്ങളെ ഏറ്റവും ഭംഗിയായി ചേര്‍ത്തുവെച്ചുകൊണ്ട്, വ്യത്യസ്തമായ രംഗങ്ങളില്‍ ‘ബേസില്‍ ടച്ച്’ വരുന്ന പ്രത്യേത കണക്ഷന്‍ കൊടുത്തുകൊണ്ടാണ് സിനിമ മുന്നോട്ടുപോകുന്നത്.

കുഞ്ഞിരാമായണത്തിലെ ദേശത്തെ ഓര്‍മ്മിപ്പിക്കുന്ന തരത്തിലുള്ള ഒരു പ്രത്യേക തരം സെറ്റിങ്ങാണ് കുറുക്കന്‍മൂലയിലേത്. റിയലിസ്റ്റിക്കായ കാര്യങ്ങളും ഫാന്റസിയും ചേര്‍ന്നുള്ള ബേസില്‍ യൂണിവേഴ്‌സിലെ ഒരു ഗ്രാമം. കുറുക്കന്‍മൂലയിലെ വീടുകളിലും ആളുകളുടെ വസ്ത്രത്തിലുമെല്ലാം ആ ഫാന്റസിയുടെ ചേരുവകള്‍ കാണാം.

മിന്നല്‍ മുരളിയിലെ സ്റ്റോറിലൈന്‍ വളരെ ലളിതമായ ഒരു കഥയാണ്. അതിനെ ഗംഭീരമാക്കുന്നത് തിരക്കഥയാണ്, സംവിധാനവും മികച്ച മേക്കിങ്ങ് സ്റ്റൈലും ചേര്‍ന്ന് ആ തിരക്കഥയെ അതിലും മികച്ച സിനിമാറ്റിക് അനുഭവമാക്കി മാറ്റുന്നു.

ഡൂള്‍ന്യൂസിന്റെ സ്വതന്ത്ര മാധ്യമപ്രവര്‍ത്തനത്തെ സാമ്പത്തികമായി സഹായിക്കാന്‍ ഇവിടെ ക്ലിക്ക് ചെയ്യൂ