ദല്‍ഹിയില്‍ സമരം ചെയ്യുന്ന കര്‍ഷകര്‍ക്ക് കേരളത്തിന്റെ കൈത്താങ്; 20 ടണ്‍ പൈനാപ്പില്‍ സമരഭൂമിയിലെത്തും
ഡൂള്‍ന്യൂസ് ഡെസ്‌ക്
Friday, 25th December 2020, 12:59 pm
കൊച്ചി: കേന്ദ്രസര്‍ക്കാരിന്റെ കര്‍ഷകവിരുദ്ധ നിയമങ്ങള്‍ക്കെതിരെ ദല്‍ഹിയില്‍ സമരം ചെയ്യുന്ന കര്‍ഷകര്‍ക്കായി 20 ടണ്‍ പൈനാപ്പിള്‍ കയറ്റിയയച്ച് പൈനാപ്പിള്‍ ഫാര്‍മേഴ്സ് അസോസിയേഷന്‍.
എറണാകുളം വാഴക്കുളത്തെ പൈനാപ്പിള്‍ കര്‍ഷകരുടെ കൃഷിയിടത്തില്‍ നിന്ന് സംഭരിച്ച 20 ടണ്‍ പൈനാപ്പിളാണ് ദല്‍ഹിയിലെ സമരഭൂമിയിലേക്ക് എത്തിക്കുന്നത്.
വാഴക്കുളം പൈനാപ്പിള്‍ മാര്‍ക്കറ്റില്‍ വച്ച് നടന്ന ചടങ്ങില്‍ കൃഷിമന്ത്രി വി.എസ്.സുനില്‍ കുമാര്‍ വാഹനം ഫ്‌ളാഗ് ഓഫ് ചെയ്തു. നാല് ദിവസം കൊണ്ടാണ് പൈനാപ്പിള്‍ കയറ്റിയ വാഹനം ദല്‍ഹിയില്‍ എത്തുക.
കര്‍ഷകരുടെ ജീവിതം വഴിമുട്ടിക്കുന്ന കേന്ദ്ര സര്‍ക്കാര്‍ നയങ്ങള്‍ക്കെതിരെ സമരം ചെയ്യുന്ന കര്‍ഷകര്‍ക്ക് തങ്ങളാല്‍ കഴിയുന്ന സഹായം ചെയ്യുക എന്ന ലക്ഷ്യത്തോടെയാണ് ഇത്തരമൊരു ഉദ്യമനത്തിന് തയ്യാറായതെന്ന് പൈനാപ്പിള്‍ ഫാര്‍മേഴ്സ് അസോസിയേഷന്‍ പറഞ്ഞു.
