കോണ്‍ഗ്രസ് രാഷ്ട്രീയകാര്യസമിതിയില്‍ നിന്ന് കെ. മുരളീധരന്‍ വിട്ടുനിന്നു; പ്രതിഷേധം നേതാക്കളുടെ യോഗത്തില്‍ പങ്കെടുപ്പിക്കാതിരുന്നതിനാല്‍
ഡൂള്‍ന്യൂസ് ഡെസ്‌ക്
Wednesday, 23rd June 2021, 6:18 pm
തിരുവനന്തപുരം: കോണ്‍ഗ്രസ് രാഷ്ട്രീയകാര്യസമിതിയില്‍ നിന്ന് കെ. മുരളീധരന്‍ വിട്ടുനിന്നു. തിരുവനന്തപുരത്ത് ഉണ്ടായിട്ടും യോഗത്തില്‍ നിന്ന് മുരളീധരന്‍ വിട്ടുനില്‍ക്കുകയായിരുന്നു. കെ. സുധാകരന്‍ കെ.പി.സി.സി. പ്രസിഡന്റ് ആയതിന് ശേഷമുള്ള ആദ്യ രാഷ്ട്രീയകാര്യസമിതി യോഗമാണിത്.
നേരത്തെ രാഷ്ട്രീയകാര്യസമിതിക്ക് മുമ്പായി നേതാക്കളുടെ യോഗം ഉണ്ടായിരുന്നു. ഇത്തരത്തില്‍ നേതാക്കളുടെ യോഗം അപൂര്‍വ്വമാണ്. എന്നാല്‍ ഈ യോഗത്തില്‍ മുരളീധരനെ പങ്കെടുപ്പിച്ചിരുന്നില്ല.
ഇതിലുള്ള അതൃപ്തിയാണ് യോഗത്തില്‍ നിന്ന് കെ. മുരളീധരന്‍ വിട്ടുനില്‍ക്കാന്‍ കാരണമായി വിലയിരുത്തുന്നത്.
സംസ്ഥാന കോണ്‍ഗ്രസില്‍ ജംബോ കമ്മറ്റികള്‍ ഒഴിവാക്കുമെന്നും 51 പേരുള്ള നിര്‍വാഹക സമിതിയായിരിക്കും ഉണ്ടാവുകയെന്നും കെ. സുധാകരന്‍ നേതാക്കളുടെ യോഗത്തില്‍ വ്യക്തമാക്കിയിരുന്നു.
