രാഷ്ട്രീയനേട്ടത്തിനുള്ള സംഘപരിവാര്‍ അജണ്ടയാണ് ലക്ഷദ്വീപിലെ ബീഫ് നിരോധനം, പിന്‍വലിക്കണം; അമിത് ഷായ്ക്ക് കെ.കെ രാഗേഷിന്റെ കത്ത്
ഡൂള്‍ന്യൂസ് ഡെസ്‌ക്
Saturday, 27th February 2021, 8:32 am
കണ്ണൂര്‍: ലക്ഷദ്വീപില്‍ ബീഫ് നിരോധനം പാടില്ലെന്ന് കെ.കെ രാഗേഷ് എം.പി. ബീഫ് നിരോധം ലക്ഷ്യമാക്കിയുള്ള ലക്ഷദ്വീപ് അനിമല്‍ പ്രിസര്‍വേഷന്‍ റെഗുലേഷന്‍ -2021 പിന്‍വലിക്കണമെന്ന് കെ.കെ രാഗേഷ് കേന്ദ്ര ആഭ്യന്തരമന്ത്രി അമിത്ഷായ്ക്ക് അയച്ച കത്തില്‍ ആവശ്യപ്പെട്ടു.
നിയമം ജനാധിപത്യവിരുദ്ധവും ഭരണഘടനയ്ക്ക് എതിരുമാണെന്നും കന്നുകാലി വളര്‍ത്തലും പാല്‍ ഉല്‍പാദനവും ജീവിതോപാധിയായി സ്വീകരിച്ചവര്‍ക്ക് കടുത്ത ആഘാതമാകുമെന്നും അദ്ദേഹം പറഞ്ഞു.
”രാജ്യത്തെ ജീവിതോപാധികളും ആഹാരരീതികളും ഇല്ലായ്മ ചെയ്യാനാണ് ശ്രമം. ബീഫ് നിരോധ ആവശ്യം ലക്ഷദ്വീപില്‍ ഒരിക്കലും ഉയര്‍ന്നിട്ടില്ല. ബീഫ് നിരോധനത്തിന്റെ പേരില്‍ ജാമ്യമില്ലാക്കേസ് ചുമത്താന്‍ ദ്വീപ് അഡ്മിനിസ്‌ട്രേഷനെ ചുമതലപ്പെടുത്തുന്നത് നിയമത്തിന്റെ ഉദ്ദേശശുദ്ധിയെ ചോദ്യം ചെയ്യുന്നതാണ്”, രാഗേഷ് പറഞ്ഞു.
