ഐ.പി.എല്‍ 2024ലെ 53ാം മത്സരത്തിനാണ് ധര്‍മശാല വേദിയാകുന്നത്. ചെന്നൈ സൂപ്പര്‍ കിങ്‌സാണ് ഹോം ടീമായ പഞ്ചാബ് കിങ്‌സിന്റെ എതിരാളികള്‍.
മത്സരത്തില്‍ ടോസ് നേടിയ പഞ്ചാബ് കിങ്‌സ് എതിരാളികളെ ബാറ്റിങ്ങിനയക്കുകയായിരുന്നു. ആദ്യം ബാറ്റ് ചെയ്ത ചെന്നൈ നിശ്ചിത ഓവറില്‍ ഒമ്പത് വിക്കറ്റ് നഷ്ടത്തില്‍ 167 റണ്‍സ് നേടി.
പഞ്ചാബ് കിങ്‌സിനായി രാഹുല്‍ ചഹറും ഹര്‍ഷല്‍ പട്ടേലും മൂന്ന് വിക്കറ്റ് വീതം വീഴ്ത്തി. അര്‍ഷ്ദീപ് സിങ് രണ്ട് വിക്കറ്റ് നേടിയപ്പോള്‍ സാം കറന്‍ ഒരു വിക്കറ്റും നേടി.
സീസണില്‍ ചെന്നൈ സൂപ്പര്‍ കിങ്‌സിന്റെ 11ാം മത്സരമാണിത്. ഇതില്‍ 10 തവണയും ഗെയ്ക്വാദിനെ ടോസ് ഭാഗ്യം തുണച്ചിരുന്നില്ല. ഇതോടെ ഒരു സീസണില്‍ ഏറ്റവുമധികം തവണ ടോസ് നഷ്ടപ്പെടുന്ന നായകന്‍മാരുടെ പട്ടികയില്‍ മൂന്നാം സ്ഥാനത്തേക്കുയര്‍ന്നിരിക്കുകയാണ് താരം.
അതേസമയം, ചെന്നൈക്കെതിരെ മറുപടി ബാറ്റിങ്ങിനിറങ്ങിയ പഞ്ചാബ് ഏഴ് ഓവറില്‍ രണ്ട് വിക്കറ്റ് നഷ്ടത്തില്‍ 56 എന്ന നിലയിലാണ്.17 പന്തില്‍ 25 റണ്‍സുമായി പ്രഭ്‌സിമ്രാന്‍ സിങ്ങും 16 പന്തില്‍ 22 റണ്‍സുമായി ശശാങ്ക് സിങ്ങുമാണ് ക്രീസില്‍.
Content Highlight: IPL 2024: CSK vs PBKS: Ruturaj Gaikwad lost the toss for the 10th time in this season
