ദല്‍ഹി ഹൈക്കോടതി ജഡ്ജിമാര്‍ക്കും കുടുംബങ്ങള്‍ക്കും പഞ്ചനക്ഷത്ര ഹോട്ടലില്‍ കൊവിഡ് ചികിത്സ
ഡൂള്‍ന്യൂസ് ഡെസ്‌ക്
Tuesday, 27th April 2021, 8:43 am
ന്യൂദല്‍ഹി: ദല്‍ഹി ഹൈക്കോടതിയിലെ ജഡ്ജിമാര്‍ക്കും ഉദ്യോഗസ്ഥര്‍ക്കും കുടുംബാംഗങ്ങള്‍ക്കും കൊവിഡ് ചികിത്സക്കായി പഞ്ചനക്ഷത്ര ഹോട്ടലില്‍ സൗകര്യമൊരുക്കുന്നതായി റിപ്പോര്‍ട്ട്.
ദല്‍ഹിയിലെ അശോക ഹോട്ടലാണ് ഇതിന് വേണ്ടി ബുക്ക് ചെയ്യുന്നത്. അശോക ഹോട്ടലില്‍ സജ്ജമാക്കുന്ന താല്‍ക്കാലിക കൊവിഡ് കെയര്‍ സെന്ററിലാവും ചികിത്സ.
പ്രിമസ് ആശുപത്രിയാണ് പഞ്ചനക്ഷത്ര ഹോട്ടലിലെ കൊവിഡ് കെയര്‍ സെന്റര്‍ നടത്തുക. കൊവിഡ് കെയര്‍ സെന്ററിലുണ്ടാവുന്ന മെഡിക്കല്‍ മാലിന്യത്തിന്റെ നിര്‍മാര്‍ജ്ജനവും ആശുപത്രിയുടെ ചുമതലയായിരിക്കും. രോഗികളെ പരിചരിക്കുന്നതിനുള്ള പ്രാഥമിക പരിശീലനം ഹോട്ടലിലെ ജീവനക്കാര്‍ക്ക് ആശുപത്രി നല്‍കും. ഹോട്ടല്‍ ജീവനക്കാരുടെ കുറവുവന്നാല്‍ പകരം ആളുകളെ ആശുപത്രി നല്‍കും.
