ഭോപാല്‍: തിങ്കളാഴ്ച വിശ്വാസവോട്ടെടുപ്പ് നടത്താന്‍ ഗവര്‍ണര്‍ ആവശ്യപ്പെട്ടതിന് പിന്നാലെ ജെയ്പൂരിലേക്ക് മാറ്റിയ കോണ്‍ഗ്രസ് എം.എല്‍.എമാരും സ്വതന്ത്ര എം.എല്‍.എമാരും ഭോപാലില്‍ തിരിച്ചെത്തുന്നു. കോണ്‍ഗ്രസ് സഭയില്‍ വിശ്വാസ വോട്ട് നേടുമെന്ന് ആത്മവിശ്വാസം പ്രകടിപ്പിച്ച എം.എല്‍.എമാര്‍ വിജയ ചിഹ്നം ഉയര്‍ടത്തിക്കാണിച്ചാണ് വിമാനത്താവളത്തില്‍ എത്തിയത്.
പാര്‍ട്ടി വിമത എം.എല്‍.എമാരെയും ബന്ധപ്പെട്ടിട്ടുണ്ടെന്ന് വിമാനത്താവളത്തില്‍ പ്രവര്‍ത്തകര്‍ക്കൊപ്പമെത്തിയ കോണ്‍ഗ്രസ് നേതാവ് ഹരീഷ് റാവത്ത് വ്യക്തമാക്കി. ‘ഞങ്ങള്‍ വിശ്വാസവോട്ടെടുപ്പിന് ഒരുങ്ങിക്കഴിഞ്ഞു. അതില്‍ വിജയിക്കുമെന്ന് ഞങ്ങള്‍ക്ക് പൂര്‍ണ വിശ്വാസമുണ്ട്. ഞങ്ങള്‍ക്ക് മാനസിക തകര്‍ച്ചയില്ല, പക്ഷേ ബി.ജെ.പിക്കുണ്ട്. വിമത എം.എല്‍.എമാരുമായും ഞങ്ങള്‍ ബന്ധപ്പെട്ടിട്ടുണ്ട്’, ഹരീഷ് റാവത്ത് പറഞ്ഞു.
അതേസമയം, വിശ്വാസ വോട്ടെടുപ്പ് നടത്തണമെന്ന് ഗവര്‍ണര്‍ ലാല്‍ജി ടണ്ടന്‍ ആവശ്യപ്പെട്ടതിന് പിന്നാലെ അവസാന ഘട്ട പ്രയത്‌നങ്ങളിലാണ് കമല്‍ നാഥ്. ഭോപാലില്‍ അദ്ദേഹം അടിയന്തര മന്ത്രിസഭാ യോഗം വിളിച്ചുചേര്‍ത്തു. ജെയ്പൂരിലേക്ക് മാറ്റിയിരിക്കുന്ന കോണ്‍ഗ്രസ് എം.എല്‍.എമാരുമായി ഉച്ചയോടെ നിര്‍ണായക ചര്‍ച്ച നടത്തുമെന്നാണ് വിവരം.
