അപകീര്‍ത്തിപ്പെടുത്തുന്ന വ്യാജ വാര്‍ത്ത; ദിലീപിന്റെ മകള്‍ മീനാക്ഷിയുടെ പരാതിയില്‍ ഓണ്‍ലൈന്‍ മാധ്യമങ്ങള്‍ക്കെതിരെ കേസ്
ഡൂള്‍ന്യൂസ് ഡെസ്‌ക്
Wednesday, 4th November 2020, 5:52 pm
കൊച്ചി: തന്നെയും പിതാവിനെയും ഓണ്‍ലൈന്‍ മാധ്യമങ്ങളിലൂടെയും സമൂഹമാധ്യമങ്ങളിലൂടെയും അപകീര്‍ത്തിപ്പെടുത്താന്‍ ശ്രമിച്ചെന്ന നടന്‍ ദിലീപിന്റെ മകള്‍ മീനാക്ഷിയുടെ പരാതിയില്‍ ഓണ്‍ലൈന്‍ പോര്‍ട്ടലുകള്‍ക്കെതിരെ പൊലീസ് കേസെടുത്തു.
ആലുവ ഈസ്റ്റ് പൊലീസാണ് കേസ് രജിസ്റ്റര്‍ ചെയ്തിരിക്കുന്നത്. കഴിഞ്ഞ ജൂലായ്, ആഗസ്റ്റ് മാസങ്ങളില്‍ വിവിധ ഓണ്‍ലൈന്‍ മാധ്യമങ്ങളിലും സമൂഹമാധ്യമങ്ങളിലും തന്നെയും തന്റെ പിതാവിനെയും അപമാനിക്കുന്ന തരത്തില്‍ വ്യാജ വാര്‍ത്തകള്‍ നല്‍കിയെന്നാണ് പരാതി.
മീനാക്ഷി അമ്മയുടെ അടുത്തേക്ക് പോകുകയാണെന്നും അച്ഛന്റെ സ്വഭാവം തിരിച്ചറിഞ്ഞ് വീട്ടില്‍ നില്‍ക്കാന്‍ ബുദ്ധിമുട്ടാണ്, അമ്മയുടെ വില ഇപ്പോഴാണ് മനസ്സിലായത് എന്നിങ്ങനെയുള്ള തലക്കെട്ടുകളോടെ വാര്‍ത്തകള്‍ നല്‍കിയെന്നാണ് പരാതിയില്‍ പറയുന്നത്.
