വസീം എന്ന ചെറുപ്പക്കാരന്റെ 20 വയസുമുതലുള്ള കഥ എന്നതിലുപരി ഒരു ദേശത്തിന്റെ സംസ്‌കാരം തന്നെ ആവാഹിച്ച സിനിമ. അതാണ് തല്ലുമാലയെ വേറിട്ട് നിര്‍ത്തുന്നത്. മലപ്പുറത്തെ സാധാരണ ചെറുപ്പക്കാരുടെ ജീവിതവും സ്ലാങ്ങും ചെറുപ്പത്തിന്റെ ചോരത്തിളപ്പുമെല്ലാം അതിന്റെ പാകത്തിന് ചേര്‍ത്ത് രൂപപ്പെടുത്തിയെടുത്ത അഡാറ് ഐറ്റമാണ് തല്ലുമാല.
‘എല്ലാരും ചൊല്ലതണതല്ലിവന്‍ കജ്ജൂക്കുള്ളൊരു കാര്യക്കാരന്‍’ എന്ന് തുടങ്ങി, ഒരു പക്ഷേ മറ്റ് ദേശക്കാര്‍ക്ക് മനസിലാകാത്ത സ്ലാങ്ങിലൂടെയാണ് പാട്ടിന്റെ വരികള്‍ കടന്നുപോകുന്നത്. എങ്കിലും പാട്ടിന്റെ വൈബ് കണക്റ്റായതുകൊണ്ട് തന്നെയാണ് മണവാളന്‍ തഗ്ഗ് ഹിറ്റായത്. ചിലര്‍ക്കെങ്കിലും ആദ്യം ഇറിറ്റേറ്റഡാവുകയും പിന്നെ അഡിക്റ്റാവുകയും ചെയ്യുന്ന ഒരു മാജിക് ഈ പാട്ടിലുണ്ട്.
മണവാളന്‍ വസീമിനെ പറ്റി എഴുതിയ പാട്ടിലെ ‘സുഗുണ്ടയിനൊരു സെരിയുണ്ട്’ എന്ന വരി കൊണ്ട് നൈക്ക് ഷൂവിനെയാണ് ഉദ്ദേശിക്കുന്നത്. വസീമിന്റെ കജ്ജില്‍ കളികള്‍ വേറെയുണ്ട്. യൂട്യൂബില്‍ ട്രെന്‍ഡിങ് നമ്പര്‍ വണ്ണായി തുടരുകയാണ് മണവാളന്‍ തഗ്ഗ്. കൂടാതെ റീല്‍സിലും വൈറലാണ് പാട്ട്.
നാട്ടില്‍ മൊത്തം തല്ലുപിടിയുമായി നടക്കുന്ന, ഇടവിട്ട് രണ്ടെണ്ണം വീശുന്ന, എന്നാലും ഒറ്റ ജുമുഅ മിസ്സാക്കാത്ത ജംഷിമാരേയും വസീമുമാരേയും മലപ്പുറത്തിന്റെ തെരുവുകളിലും ഇടവഴികളിലും കാണാനാവും. ഇത്ര ജെനുവിനായി മുസ്‌ലിം കള്‍ച്ചറിന്റെ ബാക്ക്ഗ്രൗണ്ടില്‍ കഥ പറയാന്‍ ശ്രമിച്ച തല്ലുമാല ടീമിന് അഭിനന്ദനങ്ങള്‍ ഉയരുകയാണ്.
