ഡിസെബിലിറ്റി സര്‍ട്ടിഫിക്കറ്റിനുള്ള ഐക്യു ടെസ്റ്റിന് പണം വാങ്ങുന്നതായി മന്ത്രിയുടെ ഫേസ്ബുക്ക് പേജില്‍ യുവതിയുടെ കമന്റ്; അന്വേഷണത്തിന് ഉത്തരവിട്ട് വീണ ജോര്‍ജ്
ഡൂള്‍ന്യൂസ് ഡെസ്‌ക്
Wednesday, 15th December 2021, 6:14 pm
തിരുവനന്തപുരം: തൃപ്പുണ്ണിത്തുറ ആശുപത്രിയില്‍ ഡിസെബിലിറ്റി സര്‍ട്ടിഫിക്കറ്റിന് വേണ്ടിയുള്ള ഐക്യു ടെസ്റ്റിന് പണം വാങ്ങുന്നുവെന്ന പരാതിയെത്തുടര്‍ന്ന് ആരോഗ്യ വകുപ്പ് മന്ത്രി വീണ ജോര്‍ജ് അന്വേഷണത്തിനുത്തരവിട്ടു.
സോഷ്യല്‍ മീഡിയയില്‍ വന്ന കമന്റിനെ തുടര്‍ന്നാണ് മന്ത്രി ഇടപെട്ടത്. സിന്‍സി അനില്‍ എന്ന ഫേസ്ബുക്ക് ഐ.ഡിയാണ് സംഭവം മന്ത്രിയുടെ പേജില്‍ കമന്റായി ഉന്നയിച്ചത്. ഇക്കാര്യം ശ്രദ്ധയില്‍പെടുത്തിയതിന് സിന്‍സി അനിലിനോട് മന്ത്രി നന്ദി പറഞ്ഞു.
ഈ ആശുപത്രിയില്‍ അനസ്തേഷ്യ ഡോക്ടര്‍ക്കായി പണം വാങ്ങുന്നതായും മറ്റൊരു പരാതിയുണ്ട്. ഇക്കാര്യങ്ങളില്‍ അന്വേഷണം നടത്തി കര്‍ശന നടപടി സ്വീകരിക്കാന്‍ ആരോഗ്യ വകുപ്പ് ഡയറക്ടര്‍ക്ക് നിര്‍ദേശം നല്‍കിയതായി മന്ത്രി പറഞ്ഞു.
