ബെംഗളൂരു: കന്നഡ താരം പുനീത് രാജ്കുമാറിന്റെ മരണത്തിന് പിന്നാലെ അദ്ദേഹത്തിന്റെ രണ്ട് ആരാധകര്‍ മരിച്ചതായി റിപ്പോര്‍ട്ടുകള്‍. പുനീതിന്റെ മരണവാര്‍ത്തയറിഞ്ഞ് ഹൃദയാഘാതം മൂലമാണ് ഇരുവരും മരിച്ചെതെന്നാണ് റിപ്പോര്‍ട്ടുകള്‍ പറയുന്നത്.
കര്‍ണാടകയിലെ ബെലഗാവി ജില്ലയിലെ 46 വയസ്സുള്ള പരശുറാം ദേവമ്മന്‍വര്‍, ചാമരാജ്‌നഗര്‍ ജില്ലയിലെ 30 വയസ്സുകാരന്‍ മുനിയപ്പ എന്നിവരാണ് മരണപ്പെട്ടത്.
പുനീതിന്റെ മരണവാര്‍ത്തയറിഞ്ഞതോടെ പരശുറാം കുഴഞ്ഞ് വീഴുകയായിരുന്നു. ആശുപത്രിയിലെത്തിച്ച ശേഷം 29ാം തീയ്യതിയാണ് പരശുറാം മരിച്ചത്. അതേസമയം, പുനീത് മരിച്ചതറിഞ്ഞ മുനിയപ്പയ്ക്ക് ഹൃദയാഘാതം സംഭവിക്കുകയും തല്‍ക്ഷണം മരിക്കുകയുമായിരുന്നു.
അഭിനയത്തോടൊപ്പം തന്നെ ജീവകാരുണ്യപ്രവര്‍ത്തനങ്ങളില്‍ സജീവമായിരുന്നു പുനീത്. കൊവിഡ് പ്രതിരോധപ്രവര്‍ത്തനങ്ങള്‍ക്കായി മുഖ്യമന്ത്രിയുടെ ദുരിതാശ്വാസനിധിയിലേക്ക് 50 ലക്ഷം രൂപ പുനീത് നല്‍കിയിരുന്നു.
കര്‍ണാടകയിലെ പ്രളയസമയത്ത് ദുരിതാശ്വാസ പ്രവര്‍ത്തനത്തിന് 5 ലക്ഷം രൂപയാണ് പുനീത് നല്‍കിയത്.
