തിരുവോണം ബമ്പറടിച്ച ജയപാലന് ഭീഷണിക്കത്ത്; പോപ്പുലര്‍ ഫ്രണ്ടിന്റെ പേരിലുള്ള കത്ത് കണ്ണൂര്‍ ശൈലിയില്‍
ഡൂള്‍ന്യൂസ് ഡെസ്‌ക്
Thursday, 11th November 2021, 10:37 pm
കൊച്ചി: ഈ വര്‍ഷത്തെ സംസ്ഥാന തിരുവോണം ബമ്പര്‍ ലോട്ടറിയടിച്ച കൊച്ചി മരട് സ്വദേശി ജയപാലന് ഭീഷണിക്കത്ത്. 15 ദിവസത്തിനകം 65 ലക്ഷം രൂപ നല്‍കണമെന്നും അല്ലെങ്കില്‍ ലോട്ടറിയടിച്ച തുക അനുഭവിക്കാന്‍ അനുവദിക്കില്ലെന്നും ഭീഷണിക്കത്തില്‍ പറയുന്നു.
പണം നല്‍കിയില്ലെങ്കില്‍ ക്വട്ടേഷന്‍ നല്‍കി അപായപ്പെടുത്തുമെന്നാണ് കത്തില്‍ പറയുന്നത്. തൃശൂര്‍ ചേലക്കര പിന്‍കോഡില്‍ നിന്ന് ലഭിച്ച കത്ത് കണ്ണൂര്‍ ശൈലിയിലാണ്. പോപ്പുലര്‍ ഫ്രണ്ട് കേരള, കണ്ണൂര്‍ എന്നെഴുതിയാണ് ഭീഷണിക്കത്ത് ആരംഭിക്കുന്നത്.
കത്ത് കിട്ടിയ കാര്യം വേറെയാരും അറിയരുതെന്നും പറയുന്നുണ്ട്. ബന്ധപ്പെടേണ്ട ഫോണ്‍ നമ്പറും കത്തില്‍ നല്‍കിയിട്ടുണ്ട്. ജീവിതം വഴിമുട്ടിയ 70കാരനും ഭാര്യക്കും സ്ഥലം വാങ്ങാനാണ് പണമെന്നും കത്തില്‍ പറയുന്നു.
സംഭവത്തില്‍ ജയപാലന് മരട് പൊലീസില്‍ പരാതി നല്‍കിയിട്ടുണ്ട്. പൊലീസ് അന്വേഷണം ആരംഭിച്ചു.
