ബി.ജെ.പി എം.എല്‍.എമാര്‍ക്ക് പൊതിരെ തല്ലുകിട്ടുന്നു, നേതാക്കള്‍ക്ക് ഗ്രാമങ്ങളില്‍ നിന്ന് പുറത്തുകടക്കാന്‍ പറ്റുന്നില്ല; താന്‍ കര്‍ഷകരെ പിന്തുണച്ചത് പാര്‍ട്ടിക്ക് ദോഷം ചെയ്യില്ലെന്ന് സത്യപാല്‍ മാലിക്
ഡൂള്‍ന്യൂസ് ഡെസ്‌ക്
Thursday, 18th March 2021, 9:14 am
ന്യൂദല്‍ഹി: കര്‍ഷക പ്രതിഷേധത്തെ പിന്തുണച്ച് സംസാരിച്ചത് ബി.ജെ.പിയെ ദോഷകരമായി ബാധിക്കില്ലെന്ന് മേഘാലയ ഗവര്‍ണര്‍ സത്യപാല്‍ മാലിക്. മറിച്ച് കര്‍ഷകര്‍ക്ക് വേണ്ടി സംസാരിക്കാന്‍ ആളുണ്ടെന്ന തോന്നല്‍ ഉണ്ടാകുമെന്നും മാലിക് പറഞ്ഞു.
കര്‍ഷകരുടെ അവസ്ഥ കണ്ടിട്ട് തനിക്ക് സഹിക്കാനാവുന്നില്ലെന്നും ഗവര്‍ണര്‍ പറഞ്ഞു. എം.എല്‍.എമാരെ വരെ ആളുകള്‍ തല്ലാന്‍ തുടങ്ങിയോതെടെ ബി.ജെ.പി നേതാക്കള്‍ക്ക് അവരുടെ ഗ്രാമങ്ങളില്‍ നിന്ന് പുറത്തുവരാന്‍ കഴിയുന്നില്ലെന്നും അദ്ദേഹം കൂട്ടിച്ചേര്‍ത്തു. ഈ പ്രശ്‌നത്തിന് പരിഹാരം ഉണ്ടാകരുതെന്ന് കരുതുന്നവരാണ് യഥാര്‍ത്ഥത്തില്‍ സര്‍ക്കാരിനെതിരെ പ്രവര്‍ത്തിക്കുന്നതെന്നും അദ്ദേഹം പറഞ്ഞു.
കേന്ദ്രസര്‍ക്കാരിന്റെ കാര്‍ഷിക നിയമങ്ങള്‍ക്കെതിരെ മാസങ്ങള്‍ നീണ്ട സമരം ചെയ്യുന്ന കര്‍ഷകരെ പിന്തുണച്ച് കഴിഞ്ഞദിവസം സത്യപാല്‍ മാലിക് രംഗത്തുവന്നിരുന്നു.
