ലഖ്‌നൗ: ഉത്തര്‍ പ്രദേശില്‍ നിയമസഭാ തെരഞ്ഞെടുപ്പ് അടുത്തിരിക്കെ പ്രതിപക്ഷ പാര്‍ട്ടികളുടെ നേതാക്കള്‍ക്കെതിരെ രൂക്ഷ വിമര്‍ശനവുമായി മുഖ്യമന്ത്രി യോഗി ആദിത്യനാഥ്. ചില നേതാക്കള്‍ കൊവിഡ് അതിന്റെ മൂര്‍ധന്യാവസ്ഥയിലെത്തിയ സമയത്ത് ‘ഹോം ഐസലേഷനി’ല്‍ കഴിഞ്ഞവരാണ് എന്നായിരുന്നു യോഗിയുടെ വിമര്‍ശനം.
”കൊവിഡിന്റെ സമയത്ത് വീട്ടിലിരുന്ന നേതാക്കളെ തെരഞ്ഞെടുപ്പ് കഴിഞ്ഞാലും നമ്മള്‍ അവിടെ തന്നെ ഇരുത്തണം,” യു.പിയിലെ ഇടാവയില്‍ നടന്ന ഒരു പാര്‍ട്ടി യോഗത്തിനിടെ ബി.ജെ.പി പ്രവര്‍ത്തകരോട് യോഗി പറഞ്ഞു.
”കൊവിഡ് വര്‍ധിച്ച സമയത്തും ഞാന്‍ നിങ്ങള്‍ക്കിടയില്‍ ഉണ്ടായിരുന്നു. നിങ്ങള്‍ ഓര്‍ക്കുന്നുണ്ടെങ്കില്‍, മഹാമാരി സമയത്ത് സാഹചര്യം വിലയിരുത്താനും മുന്‍നിരയില്‍ പ്രവര്‍ത്തിച്ച ആരോഗ്യപ്രവര്‍ത്തകരെ കാണാനും ഞാന്‍ രണ്ട് തവണ ഇവിടെ വന്നിരുന്നു,” ബി.ജെ.പി നേതാവ് കൂട്ടിച്ചേര്‍ത്തു.
അതേസമം മറ്റ് പാര്‍ട്ടികളിലെ നേതാക്കള്‍ വീട്ടിലിരിക്കുകയായിരുന്നെന്നും തെരഞ്ഞെടുപ്പ് സമയത്തും വീട്ടിലിരിക്കാന്‍ അവര്‍ക്ക് അവകാശമുണ്ടെന്നും അത് ജനങ്ങള്‍ ഉറപ്പുവരുത്തണമെന്നും യു.പി മുഖ്യമന്ത്രി പറഞ്ഞു.
”അവര്‍ ട്വിറ്ററില്‍ തിരക്കിലാണ്. അതുകൊണ്ട് അവരോട് പറയുക, ട്വിറ്റര്‍ നിങ്ങള്‍ക്ക് വേണ്ടി വോട്ട് ചെയ്യും, എന്ന്,” യോഗി കൂട്ടിച്ചേര്‍ത്തു.
കൊവിഡിന്റെ രണ്ടാം തരംഗം ഏറ്റവും മോശമായി ബാധിച്ച സംസ്ഥാനങ്ങളിലൊന്നായിരുന്നു ഉത്തര്‍പ്രദേശ്. എന്നാല്‍ മഹാമാരിയെ സര്‍ക്കാര്‍ നല്ല രീതിയില്‍ കൈകാര്യം ചെയ്തുവെന്നും ആരോഗ്യരംഗം മികച്ചതായിരുന്നെന്നും ചിത്രീകരിക്കാനാണ് തെരഞ്ഞടുപ്പ് അടുത്തിരിക്കെ യോഗിയുടെ നേതൃത്വത്തിലുള്ള ബി.ജെ.പി സര്‍ക്കാര്‍ ശ്രമിക്കുന്നത്.
ഡൂള്‍ന്യൂസിന്റെ സ്വതന്ത്ര മാധ്യമപ്രവര്‍ത്തനത്തെ സാമ്പത്തികമായി സഹായിക്കാന്‍ ഇവിടെ ക്ലിക്ക് ചെയ്യൂ
ഡൂള്‍ന്യൂസിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം
Content Highlight: Yogi Adityanath says leaders who were at ‘home isolation’ during hte pandemic, must remain there