ചൈനീസ് താരം കത്തായ് യീര്‍ലാന്‍ബികിയെ പരാജയപ്പെടുത്തിയാണ് യോഗേശ്വര്‍ ഫൈനലില്‍ കടന്നത്. ഒളിമ്പിക്‌സ് വെങ്കല മെഡല്‍ ജേതാവായ യോഗേശ്വര്‍ ഗ്ലാസ്‌ഗോയില്‍ നടന്ന കോമണ്‍വെല്‍ത്ത് ഗെയിംസിലും സ്വര്‍ണം നേടിയിരുന്നു.
വനിത വിഭാഗം ബോക്‌സിംഗില്‍ ഇന്ത്യയുടെ മെഡല്‍ പ്രതീക്ഷ മേരി കോം സെമിയില്‍ കടന്നു. വനിതകളുടെ 48-51 കിലോഗ്രാം വിഭാഗത്തില്‍ ചൈനയുടെ സി ഹൈജുവാനെയാണ് ക്വാര്‍ട്ടറില്‍ മേരി കോം പരാജയപ്പെടുത്തിയത്. എതിരില്ലാത്ത മൂന്ന് സെറ്റുകള്‍ക്കായിരുന്നു ഇന്ത്യന്‍ താരത്തിന്റെ വിജയം.
ഇതോടെ ഇഞ്ചിയോണിലെ ഇന്ത്യയുടെ സ്വര്‍ണനേട്ടം നാലായി. നാല് സ്വര്‍ണമടക്കം 30 മെഡലുകള്‍ നേടിയ ഇന്ത്യ മെഡല്‍പട്ടികയില്‍ എട്ടാം സ്ഥാനത്താണ്. അതേസമയം 101 സ്വര്‍ണമടക്കം 205 മെഡലുകളുമായി ഏഷ്യന്‍ ഗെയിംസില്‍ ചൈന മുന്നേറ്റം തുടരുകയാണ്.