'ഗസയിലെ ഇസ്രഈല്‍ അധിനിവേശം അവസാനിപ്പിക്കുന്നത് വരെ പോരാടും'; അമേരിക്കന്‍ റീപ്പര്‍ ഡ്രോണ്‍ തകര്‍ത്ത് യമന്‍
ഡൂള്‍ന്യൂസ് ഡെസ്‌ക്
Thursday, 9th November 2023, 3:41 pm
സന്ന: ഗസയില്‍ ഇസ്രഈല്‍ നടത്തുന്ന ഉപരോധങ്ങളും ആക്രമണങ്ങളും അവസാനിപ്പിക്കുന്നത് വരെ ഫലസ്തീന് പിന്തുണ നല്‍കുമെന്ന് യമന്‍.
ഇസ്രഈല്‍ ഭരണകൂടത്തെ പിന്തുണച്ച അമേരിക്കന്‍ എം ക്യൂ9 റീപ്പര്‍ ഡ്രോണ്‍ യമന്‍ സായുധ സേന വെടിവെച്ചിട്ടതിന് പിന്നാലെയാണ് പ്രസ്താവന.
‘ ഇസ്രഈല്‍ ആക്രമണം അവസാനിപ്പിക്കുന്നത് വരെ ഗസയെ പിന്തുണച്ച് നമ്മുടെ സായുധ സേന പ്രവര്‍ത്തിക്കും.അമേരിക്കന്‍ റീപ്പര്‍ ഡ്രോണ്‍ തകര്‍ത്തത് ഇതിന്റെ ഭാഗമായാണ്,’ സോഷ്യല്‍ മീഡിയയില്‍ പങ്കുവെച്ച കുറിപ്പില്‍ അന്‍സറുല്ലയുടെ വക്താവ് മുഹമ്മദ് അബ്ദുല്‍ സലാം പറഞ്ഞു.
യമന്റെ പരമാധികാരത്തിനെതിരായ എല്ലാ ശത്രുതാപരമായ കുതന്ത്രങ്ങളെയും പ്രതിരോധിക്കാനുള്ള തങ്ങളുടെ സന്നദ്ധത സായുധ സേന ഉറപ്പിച്ചതായി അദ്ദേഹം ചൂണ്ടിക്കാട്ടി.
